Donibaneko kiroldegi berrian piraguentzako gordelekua jarri dute bazkideentzako nahiz beste erabiltzaileentzat; jendearen interesa handia zela bazekiten, baina aurreikuspen guztiak gainditu dituzte.
Isabel Mancebo Baldaren ilustrazioa (moldatua)
Ez dira edozein txokotan erraz sartzen diren horietakoak, euren espazioa behar dute eta behar direnerako hartzeko erraza izatea komeni da. Piragua zaleak asko dira Oarsoaldean, are gehiago Pasaian, eta hemendik aurrera errazago izango dute euren kirola praktikatzeko Donibaneko kiroldegi berrian jarri duten piraguentzako gordelekuari esker.
«Kirol gune hau egin zenean piraguen gordelekua jartzeko aukera ikusi genuen. Erabiltzaileek eurek ere aipatu digute oso aukera ona dela, beraiek Hondarribian, Donostian edo bakoitzak bere garajeetan edukitzen zituzten piraguak. Hortaz, beti autoa hartu behar izaten zuten», azaldu du Jesus Pino piraguen gordelekuko arduradunak.
Gordelekua uretik hogei metrora dago, eta piragua zaleek tresnak hartu eta berehala uretaratzeko aukera dute. «Hemen ondo kokatuta daude piraguak, bakoitzak bere tokia du; izan ere, toki batzuetan bat bestearen gainean pilatuta egoten dira», Pinok esan duenez.
Guztira 40 leku daude eta soilik bost daude libre, hilabete batean 35 erabiltzailek eman dute izena: «Jendea interesatuta zegoela bagenekien, baina ez hainbeste, gure aurreikuspenak gainditu egin dira». Leku guztiak betez gero, itxaron zerrenda bat jarriko dute, eta aurrerago gordelekuaren espazioa zabaldu ote daitekeen aztertuko dute.
Zerbitzu hau erabiltzeko izatea nahi du Pasaiako Udaleko Kirol Sailak: «Ez dugu garaje moduan erabiltzerik nahi». Eta hori txartelaren bidez kontrolatuko dute. Izan ere, erabiltzaile bakoitzak txartel elektroniko bat izango du gordelekura sartzeko.
«Txartelen bidez ikusiko dugu jendearen mugimendua eta piragua bertatik ateratzen ez duen baten bat baldin badago, hurrengo urtean ezin izango du berritu», Jesus Pinok adierazi duenez. Bazkideek beste hainbat zerbitzuez gozatzeko aukera izango dute. Momentuz aldagelak erabili ahal izango dituzte, eta udan egingo diren egokitzapenak eta gero, gimnasioa eta eremu termo-ludikoa erabiltzeko moduan izango dira.
«Gauza batekin, gainera, harritu egin gara. Pentsatzen genuen jendeak piragua txikiak izango zituela, baina gehienek piragua luzeak dituzte, zeharkaldiak-eta egiteko erabiltzen diren horietakoak», esan du Pinok.
Alokairu zerbitzua
Momentuz, piraguen alokairu zerbitzua geldirik badago ere, «berehala» martxan jartzeko asmoa dute: «Oporraldia dela eta, guk ezin dugu zerbitzu hau kudeatu. Hortaz, pertsona batekin hitz egin behar dugu eta berari deituta aldez aurretik hitzordua jarri, berarekin gelditu eta piraguak alokatu ahal izango dira». Irailetik aurrera kiroldegitik bertatik kudeatuko dute zerbitzua. Lau piragua bikoitz eta indibidual bat alokatzeko aukera dago: «Piraguak alokatuko dituzten erabiltzaileak normalean piraguan ibiltzen ez direnak izango direla pentsatzen dugu. Beraz, oso seguruak dira, ezin dira hondoratu. Itxura desberdina dute, baina segurtasun kontuengatik da». Ordu eta erdiz alokatu ahal izango dira, denbora horretan badia guztiari buelta eman daitekeela kalkulatzen dute.
Gordelekuan piragua gordetzeko eskaerak Donibaneko kiroldegian bertan egin daitezke, 943 34 53 71 telefono zenbakira deituta, edo kiroldegia@hotmail.com helbidera idatzita. Prezioak pasaia.net atarian kontsulta daitezke.
