Pasaialdea Biziberritzeko hitzarmenari beste akordio bat eranstea adostu dute bi aldeek
Kaiko Herreran garai batean libratutako lurrak berriro okupatu ditu Portu Agintaritzak
Marisol Garmendia, Lurralde Antolaketako Departamentuko foru diputatu eta Pasaiako alkate Izaskun Gomezek biziberritzea “behin betiko desblokeatzen duen akordioa” izenpetu dute, Gipuzkoako Foru Aldundiko iturriek jakinarazi dutenez.
Zehaztu dutenez, Pasaialdea Biziberritzeko hitzarmenari beste akordio bat eranstea adostu dute, diruz lagundutako jardueretan ondoko hauek sartzeko: Alabortzako kala egonkortzeko lanak; gizarte, kultur eta kirol arloko ekipamenduan eraikinaren 4. fasea egitea; Ondartxon 300 tonako lehorreratzeko gurdia jartzea eta kofinantzatutako jardueren publizitate gastuak sartzea.
Aldaketak ekarpenetan
Hitzarmena sinatu zenetik –Maider Ziganda alkate zela sinatu zen aipatu hitzarmena, 2009. urtean– Aldundiak 15.275.783,03 euroko ekarpena egin duela baieztatu dute gaur bertako iturriek, eta beraz, 5.787.910,93 euro geratzen direla gauzatzeko. Aldundiaren aurreikuspenen arabera, aurten eta hurrengo urtean gauzatuko dira soberakin horiek.
Modu berean, hitzarmena sinatu zenetik denbora luzea igaro dela kontuan hartuta, oraindik egin gabe dauden hainbat jarduera egunean jarri beharko direla adierazi dute, eta egin beharreko ekarpenetan aldaketaren bat egitea litekeena dela baieztatu.
EH Bilduk, ordea, geratzen den dirua zertan inbertitu aurreko legegintzaldian adostu zutela esan du
gaur goizean gai beraren harira emandako prentsaurrekoan. Aldundiak zabaldutakoa jakin ondoren, berriz, gezurretan aritzea leporatu die bi aldeei: “Gezur biribila, 2009ko hitzarmenaz ari dira. Ez dago hitzarmen berririk PSE-PNVrentzat Pasaia ez delako lehentasuna”.
Hitzarmenaren xede diren jarduerak:
1. Portuko eta hiriko trafikoa bereiztea: portuko trafiko astuna eta hiriko trafikoa bereizi nahi dituzte, gaur egun Gomistegiko biribilgunean sortzen diren arazoak saiheste aldera.
2. Ziriza etxea zaharberritzeko lanak: Ziriza Etxea zaharberritzeko lanak, Herrera iparraldearen antolaketa berriko kultur zentro gisa eta erdigune gisa egokitzeko. Foru Aldundiaren ekarpena 501.941 euro izango da guztira.
3.- Alabortza kala lehengoratzeko lanak: lanek 400.471,68 euroko aurrekontua dute. Kopuru hori orain arte egin denari erantsiz gero, 383.487,52 euro dira guztira, hau da, hasierako aurreikuspena baino 86.487,52 euro gehiago. Beste alde batetik, inguru horretan izan zen luizia konpontzeko proiektu bat egin dute eta horren arabera lurra erabat finkatzeko, 654.175,85 euroko inbertsioa egin behar da. Oraingoz 350.000 euroko ekarpena egingo dute.
4. Donibaneko erabilera anitzeko eraikina
5. San Pedron, pilotalekuko zumardia: PROISA eraikina eraitsi, orubea azkendu eta egokitu, ingurua saneatzeko eta pilotalekuaren atzeko aldeko hormaren narriadura arriskuari aurre egiteko, 60.000 euroko ekarpena egingo dute.
6. Ondartxo: Albaola elkarteari laguntzeko, 100.000 euroko ekarpena egingo dute 300 tonako lehorreratzeko gurdia jartzeko. Guztira 237.245 euroko inbertsioa izango dute.
7.- Molinao erreka parkearen eta Euskadi etorbidearen urbanizazioa: Molinao erreka parkea-kirol instalazioa, eta Euskadi etorbidea urbanizatzeko lanak bukatze aldera, 2015ean 62.712 euroko eta 33.394 euroko ekarpenak egingo dira hurrenez hurren.
8.- Arrain lonja berria eraikitzea: EAJ eta PSE-EE jarduera hau hitzarmenean jarraitzearen aldekoak badira ere, edukia eguneratu egin behar dela uste dute.
