Biziberritzearen gainean EAJko Nahikari Oterminek esandakoak erantzun eta gaitzetsi ditu koalizio abertzaleak
EH Bilduk biziberritzeak integrala izan behar duela defendatu du
Hauteskundeen ostean bolo-bolo dabil Pasaiako biziberritzearen gaia hainbat hedabidetan. Gaiari buruz prentsan hitz egiten azkena Nahikari Otermin izan da, EAJko bozeramailea Pasaiako Udalean eta hirigintza zinegotzia. 2016rako hondeamakinak kaiko Herreran izango direla iragarri du, besteak beste, Oterminek, gaiaren inguruan hitz egiteko asteetako elkarrizketak izan dituztela gaineratuz.
Iragarpen horren harira, EH Bilduk salatu du gaiari buruz ezer ez jakitea. “Hauteskundeetan euren ardatz nagusia gardentasuna zela adierazi zutenak ez dira gai izan bi hilabetetan bozeramaileen batzorderako dei bat bera ere egiteko”, kexatu dira. “Bitxia da, gainera, Pasaiako Udalak beste erakunde batzuekin bilerak egin izana, oraindik gobernua eratua ez zegoenean”, gaitzetsi dute. “Zen joan da ezer defendatzera, eta nora?”, galdetu dute. Zentzu horretan, gobernu programaren berririk izan gabe “pasaitarrei soldata igoeraren berri besterik ez eman” izana deitoratu dute.
Biziberritze integralaren alde
Udal gobernu berriak gaiaren aurrean zein jarrera duen jakin nahiko luketela esan dute, bide batez, EH Bilduko zinegotziek. Zentzu horretan nabarmendu dute, PSE-EE eta EAJ ez direla bat etorri gaiaren gainean hartu izan diren erabakietan, eta gogoratu dute Otermin izan zela aurreko legegintzaldian Portua eta Udalaren arteko errespetuzko markoaren kontra agertu zen bakarra.
EH Bilduk, era berean, mingarritzat jo du “desblokeatzera datozela” iragarri izana, “zer eta eurek blokeatu zutena”. Diotenez, ez dago ezer desblokeatzeko, Foru Aldundiarekin sinatutako hitzarmena bukatzear dagoelako, eta geratzen den dirua zertan inbertitu alderdi guztiekin adostu zutelako aurreko legegintzaldian. Zentzu horretan salatu dute EAJk eta PSE-EEk Pasaiako badiara hogeita bost milioi euro ekartzeko aukerari atea itxi izana.
Era berean, gogoratu dute bere egiten dutela Herrera Herrirak proposatutakoa eta zentzu horretan kaiko Herreraren ordenaziorako udalbatzarrak 2011. urtean adostutakoa. “Herritarrek zer nolako Pasaia nahi duten erabakia dute”, goraipatu dute.
Biziberritzea integrala behar duela defendatu du EH Bilduk, eta “obra apur batzuekin herritarron eskaerak isilarazi” nahi dutenei EH Bilduren babesa ez dutela izango esan diete. “Pasaiak ez du behar, eta ez du merezi instituzioen arteko elkarrizketa antzu eta amaigaberik. Pasaiak erakundeen inplikazio finantzarioa besterik ez du behar, herritarrek erabakitakoa gauzatu dadin”.
