Organo kolegiatuetako ordezkariak izendatu ditu udalbatzak

Gobernu taldeak kudeaketarako gaitasun falta erakutsi du EH Bilduren ustez.

2015/07/30

Gaurko plenoa

Ezohiko osoko bilkura egin dute gaur goizean Lezoko Udalean. Puntu bakarra zegoen gai zerrendan eta bost minutu nahikoak izan ditu udalbatzak organo kolegiatuetako ordezkariak izendatzeko. Horrenbestez, Añarbeko Uren ordezkari titularra Jose Angel Sanchez PSE-EEko zinegotzia izango da eta ordezkoa, EAJko Irlentz Ortega. San Markos Mankomunitatean EAJko Noemi Arberas izango da ordezkaria, eta alderdi bereko Alfredo de la Puente izango da haren ordezkoa. Behemendirako ordezkaria, berriz, Alfredo de la Puente izango da, eta Irlentz Ortega ordezkoa. Oarsoaldea Garapen Agentziarako Kepa Garbizu alkatea izango da ordezkaria, eta EH Bilduko Ainhoa Zabalo ordezkoa. Euskal Fondoan, azkenik, Noemi Arberasek ordezkatuko du udala, eta EAJko Xubero Ubillos izango da haren ordezkoa. EAJ eta PSE-EEren arteko “kromo aldaketa” Kezka azaldu du EH Bilduko eledun Ainhoa Zabalok “gobernu taldeak erakutsi duen kudeaketarako gaitasun faltagatik. Gaurko plenoa horren adibidetzat eman du: “Astelehenean deitu gintuen alkateak batzorde bozeramaile batera kanpo ordezkaritzaz hitz egiteko. Bilera hori orain aste pare bat egin izan balu, gaurko plenoa ez litzateke beharrezkoa”. “Itxurak egitea” ere leporatu dio Zabalok EAJri, “gurekin adostuta gobernatu duzuela diozue, baina kanpo ordezkaritzetan argi eta garbi sentitu dugu kromo aldaketa izan dela. PSE-EErekin adostu dituzue interesatzen zitzaizkizuen ordezkaritzak, eta guri aukeran utzi dizkiguzue zuentzako interesik ez dutenak, eta horregatik kontra egingo dugu”. Proposamenak aurrera egin du EAJ eta PSE-EEko zinegotzien aldeko bozkekin.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.