Hondarribiak gizonetan eta San Juanek nahiz Hibaikak emakumeetan Kontxa irabazteko aukerak dauzkate. Lehen estropadan, San Juan eta San Pedro ondo ibili dira.
San Pedro, atzo bogan. Argazkia: Josu Z.
Errepide lotune oso garrantzitsua da Pasai Antxo. Bertara Donostiatik iritsi daiteke, eta behin Antxon, aukera dago Bidasora, Oarsoaldeko gainontzeko herrietara, nahiz autobidetik Zumaia edo Bizkai aldera joateko, Bermeora adibidez. Kontxako banderek, biek, traza hori dute gaur, astelehenarekin: gizonena Hondarribiak Donostiatik herrira hurbildu du, Antxo aldean dago, eternoak izatea nahi dituen ia bi segundori esker; hurrengo igandean, bigarren jardunaldian, Gaintxurizketa gainditu eta Hondarribiko Kale Nagusira hurbildu nahiko dute bandera, Antxon A8 autobidea Bizkai aldera hartu baino lehen. Emakumeenak, igandean, Antxotik Donibanerako edo Errenteriarako bidea har dezake, baina Zumaiarako errepidea ez da zaila hartzea Antxotik.
Emakumeetan, aurreko sasoiko San Juan-Hibaika lehia gogoangarriak berriz ere errepikatu ziren atzo Kontxan. Estropada hasieratik hartu zuen aurrea Zumaiak, hirugarren hautagaiak, baina gorriek ez zituzten gainetik kendu joanekoan ez pasaitarrak zein errenteriarrak, egoskor aritu ziren olatuen kontra. Ziabogan gorriek bi segundo atera zizkieten sanjuandarrei, eta lau errenteriarrei. Orio jada jokotik kanpo zegoen, bederatzira. Bueltako luze izugarria egin zuten Oarsoaldekoek: 5:20 biek, Zumaiaren 5:25en aldean. Bost segundo jan zizkioten bueltakoan, olatuen alde, eta horrek eragina izan zuen sailkapen nagusian eta banderaren jabetzaren norabidean. Helmugan: San Juanek 10:36:36; Hibaikak 10:38:50; Zumaiak 10:39:38, eta Oriok 10:49:42. Esandakoa, Antxon dago bandera, Donibaneko edo Errenteriako bidea hartu zain, baina A8ko sarbidea hurbil duela Zumaia aldera joateko.
Gizonetan,
Hondarribiaren itzalean egon ziren San Juan eta San Pedro, berdeak izan ziren lehenak lehen jardunaldian Urdaibairi bi segundo aterata. Moreek lehen txandan egin zuten arraun Urdaibai, Orio eta Donostiarrarekin batera. Bigarren mailako aktore izan ziren bizkaitarren eta oriotarren bandera grinaren atzetik, eta hasieratik diferentzia galtzen joan ziren Aitor Baldaren trainerukoak. Berdin du. San Pedroren lana orokorrean hartu behar da, sasoi guztia begiratuz: urtarrilean, nork esango zuen San Pedro Kontxan zegoela? Bada hor dago
Libia, estropada garrantzitsuenean sanpedrozaleen gozamenerako. Urdaibai txandaren irabazletik 34 segundora iritsi ziren helmugara, eta kontsolazio txandan —askok nahiko lukete txanda horretan ere egon, galde diezaietela bestela osteguneko sailkapen estropadan Kontxatik at gelditu zirenei— parte hartuko dute moreek igandean. Lan ona egingo dute, ziur.
San Juan, aldiz, bigarren txandan atera zen, Hondarribia, Kaiku eta Tiranekin batera. Esan daiteke sasoiko estropadarik onenetakoa egin zutela arrosek. Hondarribiaren erlojupeko partikularraz gain, Kaiku ez zuten urrun izan Joseba Fernandezen mutilek, eta gainera, nabarmen atzean utzi zuten Tiran. Bosgarren izan ziren sailkapen nagusian, txanda nagusiaren ametsa ez oso urrun. Lan bikaina egin zuten
San Juan ontzikoek, eta horrek jarraipena izan behar du hurrengo igandean. Gainera, zale arrosena izan zen gehienbat atzo Kontxa, hortaz, hurrengo igandean
Marea arroxa harro sentiarazteko moduko lana egingo dute.
Gizonen sailkapena
- Hondarribia: 19:12.74
- Urdaibai: +1.92
- Orio: +14.44
- Kaiku: +15.82
- San Juan: +22.88
- Tiran: +29.86
- San Pedro: +36.58
- Donostiarra: +1:00.98
Emakumeen sailkapena
- San Juan: 10:36:36
- Hibaika: +2:14
- Zumaia: +3:00
- Orio: +13:06
