Eguneroko premiei aurre egiteko euskara praktikoa eskainiko du AEK-k
Intxixu AEK euskaltegiak matrikulazio epea ireki du; aurtengo ikasturteko eskaintzaren berri eman dute goizean egin duten agerraldian.
AEK-ko eta udaleko ordezkariak goizean egin duten agerraldian
Intxixu AEK euskaltegiak matrikulazio epea ireki du. Gaur goizean eman dute aurtengo ikasturteko eskaintzaren berri AEK-ko Saioa Ballesterosek, Uxua Larretxeak eta Olatz Mitxelenak, Euskara teknikari Maite Berruetek eta Euskara zinegotzi Ioritz Aizpuruk. Eskaintza erabilera praktikoan oinarritzen dela nabarmendu dute, eguneroko premiei aurre egiteko asmoz.
Euskalduntze maila, alfabetatze maila eta autoikaskuntza dira euskaltegiak eskaintzen dituen aukerak. Euskalduntze mailakoak astelehenetik ostegunera bi orduz aritzen dira eta alfabetatzen mailatik gorakoak astean hirutan bi orduz. Dena den, taldeak ikasleen arabera sortu ohi dituzte. Autoikaskuntzaren kasuan, ikasleek eurek aukeratzen dute ordutegia zein erritmoa. Euskaltegira astean zehar hiru orduz (tutoretzako ordubete eta mintzaguneko bi) agertu behar da.
Horrez gain, ikasturtean zehar hainbat ekintza egiten dituzte ikasitakoa praktikara eramateko: afariak, irteerak, sagardotegia, mendi irteerak…
Diru laguntzak Oiartzungo Udalak beka sistema bat du euskaltegiko ikasleei laguntza emateko. Hala, herrian erroldatua dagoen eta asistentzia altua duen ikasleari matrikularen %50a aurreratuko dio. Gainera, langabetua, gurasoa, ikaslea… izanez gero, %20 gehiago itzuliko dio ikasturtea bukatzean.
Matrikula epea hilaren 30a arte egongo da zabalik. Izena emateko edo informazio gehiago lortu nahi izanez gero, euskaltegia Fermiñene etxeko 2. solairuan dago. Telefono bidez kontaktatu nahi izanez gero, 607 53 42 63 edo 943 49 39 57 zenbakietan.
