Kataluniako egun handian parte hartuko du oiartzuar lagun talde batek, Diadan; atzo abiatu ziren autobusez eta gaur Bartzelonan pasatuko dute eguna. Igandean dantza emanaldia eta Emarriren erakustaldia izango dira.
Isabel Mancebo Baldaren ilustrazioa
Diadan izango da gaur oiartzuar talde bat, Kataluniako egun handian. Atzo abiatu zen autobus bat Haurtzaro Ikastolako aparkalekutik. Ilusioarekin joan ziren.
L’Arboç herrira (Tarragona, Herrialde Katalanak) ailegatu ziren atzo, eta Festaktua 2015 jaialdian egoteko aukera izan zuten butifarrada jatearekin batera.
Hurrengo egunetarako asteburu biribila antolatu diete Kataluniako lagunek eta L’Arboçen, Banyeres del Penedesen (Tarragona) eta gaur Diadan izango dira, Bartzelonan. Goizean trenez abiatuko dira Bartzelona aldera, 50 minutu inguruko bidaia eginaz. Eguna bertan pasatuko dute eta arratsaldeko ekitaldia bukatuta itzuliko dira L’Arboçerara berriz ere. Behin egun handia pasata, lasai-lasai ibiliko dira inguruak ezagutzen.
Igandean Banyeres del Penedesen izango den jaialditxoan parte hartuko dute. Hala nola, dantza emanaldia eskainiko dute oiartzuarrek eta Emarri taldeak harri tiratze saioa egingo du. Horrez gain, Oiartzungo sagardoa eta gazta dastatzeko aukera izango dute hango herritarrek, guztia trikitixa eta panderoak alaituta.
Senidetza lantzeko aukera
Oiartzungo eta Banyeres del Penedesko herritarren arteko lotura ulertzeko lau urte joan behar da atzera. 2011ko abuztuan, Carros De Foc mendi zeharkaldia egiten zebiltzala, Oiartzungo mendizale talde batek Banyeres del Penedesko beste lagun talde bat ezagutu zuen. Ordutik harremana ez dute galdu, eta bai hemendik eta bai handik bixitak ugariak izan dira: hango eta hemengo jaiak, produktuak elkartrukatzeko bidaiak, lagunartean egoteko aitzakian…
Gure Esku Dago dinamikaren haritik ere harreman handia izan dute bi herrietakoek. Besteak beste, Oiartzunen izan dira Banyeres del Penedesko Draca eta Trabucaireak eta L’Arboçeko Bastonersak, baita Arbizuko giza katean eta Donostiako Anoetako ekitaldian.
Bidaia hau Banyeres del Penedes eta Oiartzunen arteko senidetzaz hitz egiteko ere baliatuko dute: «Urte hauetan zehar harremanetan izandako bi lagun taldeek behin baino gehiagotan aipatu dugun gaia izan da». Agian, beraz, denbora epe batera bi herrirekin izango du senidetza Oiartzunek.
Egitaraua
Gaur, diana Bartzelonan
Goiza. Adinez nagusiak direnek edo gurasoekin daudenek goizetik Bartzelonara joateko aukera izango dute trenez. Besteak goizez L’Arboçen izango dira jolasten, entseatzen…
Bartzelonara. Eguerdian, edo Diadako antolatzaileak agintzen dutenean.
Arratsaldean. Diadan parte hartzea. Dantza, musika…
Ilunabarrean. L’Arboçera.
Bihar
Goiza. Adinez nagusiak direnek edo gurasoekin daudenek goizetik eguna libre hartzeko aukera izango dute. Besteak Banyeresko igerilekuan ibiliko dira.
Arratsaldean. Igerilekura.
Etzi, igandea
12:00etan. Dantza emanaldia eta Emarriren erakustaldia Banyeresko kultur etxearen aurrean.
Arratsaldean. Bazkaldu eta gero etxera buelta.
