Bigarren jardunaldian ez zuten punturik poltsikoratzeko aukerarik izan Oiartzungo neskek, Albacetek 4-3 irabazi zion.

OKE-ko neskak lehenengo jardunaldian aurreko asteburuan
Bigarren jardunaldian ez zuten punturik poltsikoratzeko aukerarik izan Oiartzungo neskek, Albacetek 4-3 irabazi zion. Atzo jokatu zuten norgehiagoka Ciudad Deportiva zelaian. Lehenengo zatia “ahazteko” modukoa izan zen OKEkoek adierazi bezala, izan ere, atsedenaldira 3-0eko emaitzarekin joan ziren. Bigarren zatian, baina, markagailua berdintzea lortu zuten oiartzuarrek Jone Bilbao, Esti Bajo eta ITxaso Nabaskuesen golei esker, azken bost minututan Albaceteko aurrelariak gola sartu zuen arte.
Oraingoz puntu bakarra du Oiartzunek eta 12. postuan dago.
Mutilen garaipena
Erregional Ohorezko Mailan lehen partida jokatu zuten mutilek larunbatean. Dena ematera atera ziren eta Hernaniko jokalariak harrituta utzi zituzten, lehen 11 minututan hiru gol sartu baitzituzten Endika Basasorok, Eñaut Fernandezek eta Ibai Lekuonak. Hernanik ez zuen erreakzionatzeko aukerarik izan eta gol bakarra sartu zuen.