Bigarrenez jarraian Kontxa irabazi dute San Juango emakumeek. Historia egin dute. Baina Hibaika ez dute urrun izan.
San Juango mutilak, neskei ohore egiten, atzo portuan
Bigarrenez jarraian Kontxa ekarri dute herrira San Juango arraunlariek, batelerek. Historia, letra handiekin. Bi igandetako estropadak irabazita, gainera, iritsi da Donibanera emakumeen estropada preziatuena, baina estu. Horrek balio handiagoa ematen dio garaipenari, jakinda gainera Donostiako estropada eremuko lehen kaletik irten zirela arrosak, teorian, atzoko kalerik eskasena.
Bandera eskuan, portuko arrapalan jaso zuten harrera egoeraren araberakoa izan zen, handia. Arrosa zen Donostia atzo, irribarrez betetako arrosa, garaipenaren arrosa. Eta arratsaldean herrian jaso zuten harrera sekulakoa izan zen, lehenik desfilea egiten, ondoren arraun taldearen egoitzan, azkenik bete-bete zegoen plazan.
Hibaika, atzo ere, ez zuen urrun izan San Juanek. Oso ona errenteriarren Kontxa, borrokaz betea, esfortzuz eta izerdiz gainezka. Oso kontuan hartzekoa izan da Madalen ontziak egindako lana, iazko sailkapena, besteak beste, hobetu dutelako Hibaikakoek Zumaia indartsua atzean utziz. Eta errenteriarrek ere merezitako harrera izan zuten herrian. Jarrai dezatela horrela, garaipenak gutxi barru iritsiko direlako.
Gizonak, ondo
San Pedro eta San Juan gaizki deituriko kontsolazio txandan atera ziren atzo. Txanda horretan San Juan izan zen garaile, bigarren San Pedro. Hau da, bakoitzak bere helburuak beteta bukatu zuten 2015eko Kontxa. Merituzkoa ere bi traineruen lana. Orain, asteburuan, San Miguel Ligako azken bi estropadak izango dituzte pasaitarrek.
Eta banderari begira,
Hondarribiak azkenean ezin Urdaibairekin. Kontxa ez irabazteak ez du lausotu behar berdeen sasoi handia.
Emakumeen denborak
- Lehen jardunaldia: San Juan 10:36; Hibaika 10:38; Zumaia 10:39; Orio 10:49.
- Bigarren jardunaldia: San Juan 10:38; Hibaika 10:40; Zumaia 10:44; Orio 10:57.
- Denbora metatua: San Juan 21:15; Hibaika 21:18; Zumaia 21:23; Orio 21:46.
Gizonen denborak
- Lehen jardunaldia: Hondarribia 19:12; Urdaibai 19:14; Orio 19:27; Kaiku 19:28; San Juan 19:35; Tiran 19:42; San Pedro 19:49; Donostiarra 20:13.
- Bigarren jardunaldia: Urdaibai 19:20; Hondarribia 19:27; Orio 19:27; Kaiku 19:27; San Juan 19:41; San Pedro 19:50; Tiran 20:09; Donostiarra 20:24.
- Denbora metatua: Urdaibai 38:35; Hondarribia 38:40; Orio 38:54; Kaiku 38:56; San Juan 39:16; San Pedro 39:39; Tiran 39:51; Donostiarra 40:38.
