Bizikleta festa egingo dute mugikortasunaren astea dela eta

Ostiralean izango da, bi deialdirekin: 11:00etan eta 12:00etan, Biteritik.

2015/09/15

Mugikortasunaren Asteko aurkezpenean Jose Cruz Legorburu eta Jon Txasko.

Errenteriako Udalak bat egin du Europako Mugikortasun Astearekin, eta larunbatera begira, Bizikleta festa egingo dute, laugarrenez. Bi deialdi egin dituzte: 11:00etan, 2006etik aurrera jaiotakoentzat eta 12:00etan, helduagoentzat. Edonola ere, ekitaldia haurrei izan ezik gurasoei eta bestelakoei ere irekia dagoela gogorarazi dute Jon Txasko Trafiko zinegotziak eta Jose Cruz Legorburu Ingurumen zinegotziak. Ibilbidea Biterin hasi eta bukatuko dute, eta bidean, Tulle, Fanderia eta handik Alabergaraino joango dira. Kaskoa eraman behar dela gogorarazi du Txaskok. Aurtengo leloa Aukeratu. Aldatu. Konbinatu da, eta horren bidez, herritarrei igorri nahi dieten mezua da egunerokoan autoa etxean utzi eta beste garraiobideak erabiltzea, “garraiobide mota ezberdinak aukeratu, aldatu eta konbinatuz: bizikleta, garraio publikoa edo oinez ibiltzea. Bizikleta aparkalekua eta erregistroa, berritasunak Bizikleta erabiltzen duten herritarrek bi berritasun izango dituzte laster. Batetik, bizikleta erregistro bat osatu nahi du udalak segurtasun irizpideak direla eta, eta horretarako Udaltzaingoan eman daitezke datuak, eta honakoak dira: izen abizenak; NAN; helbidea, telefonoa eta posta elektronikoa; bizikletaren serie zenbakia, bizikletaren marka, modeloa eta kolorea; eta argazki digitala. Bestetik, herrian bizikletak aparkatzeko tokiak jartzen ari da udala, eta horietako bat Alhondigan kokatuko da. Estalitako eta zaindutako gune bat izango da eta hogei bizikletentzako tokia egongo da. Horretarako bi baldintza bete beharko dira: bizikleta erregistratua egotea eta emango zaien pegatina jarrita edukitzea koadroaren gaineko barran. Ez da bizikletak gordetzeko toki bat, aparkatzeko baizik, eta horregatik, gehienez lau egunez eduki ahal izango da txirrindua. Horrekin herritarrek garraiobide hau erabiltzea sustatu nahi dute. Gainera, kontuan hartuta, Topo geltokiaren ondoan dagoela, aurtengo Mugikortasun Astearen leloak dioen konbinaketa egin ahal izango dute erabiltzaileek.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.