Ostiralean bukatzen da udal euskaltegian izena emateko epea

Ikastaro eskaintza zabala dute udal euskaltegian, euskara ikasi edota hobetu nahi dutenentzat

olatz mitxelena

2015/09/15

Udal euskaltegiko arduradunak

Euskarak batzen gaitu lemapean matrikulazio kanpaina bete-betean da Pasaiako Udal Euskaltegia. Bertako arduradunek gogoratu dutenez, ikastaro eta ordutegi aukera zabala eskaintzen diete euskaltegian, bai euskara ikasten hasi nahi dutenei bai ikasprozesuan aurreratu eta hobetu nahi dutenei. Maila guztietako ikastaroak antolatzen dituzte, eta horrez gain, EGA zein HABEren azterketetarako prestatzen dituzte ikasleak. 07:00etatik 21:00ak arte, erritmo eta maila ezberdinetako ikastaroak eskaintzen dituzte, herritar guztien beharretara egokitu asmoz. Erabilera indartzeko programak Bere kasa etxean euskara ikas nahi duten ikasleei Boga programa ere eskaintzen diete. Zehaztu dutenez, tutoretza eta mintzasaio batzuekin osatzen dute internet bidezko bakarkako ikasketa prozesua. Horiez gain, euskararen erabilera indartzeko hainbat programa garatzen ditu euskaltegiak, esate baterako, kanpo-ekintzak (txangoak, hitzaldiak, txapelketak, …), Mintzalaguna –euskaltegitik kanpo euskaraz hitz egiteko aukera ematen duen egitasmoa–, Mintzagun tailerrak –euskaltegietako ohiko dinamikatik at, euskaraz orotariko gaiak jorratzeko tailer modukoak–, eta baita urtez urte Santa Ageda bezperaren inguruan antolatzen duten kultur astea, edota asteburuko barnetegiak ere. Diru laguntzak Euskaltegiak nabarmendu duenez, Ikasle pasaitarrek matrikularen % 100 berreskuratu ahal izango dute ikasle, guraso edo langabetuak baldin badira, eta % 75 gainerakoek. Zehaztu dutenez, Pasaiatik kanpokoentzat ere izaten dira diru-laguntzak, beti ere udalerrian udalerriko irizpideen arabera. Horiez gain, Pasaian erroldatuta dauden langabetuek euskara ikastaro trinkoak jaso ditzakete doan. Ostirala arte dago izena emateko aukera, eta informazio gehiagorako edota izena emateko euskaltegira bertara jo behar da (Euskadi Etorbidea 61, Trintxerpeko anbulatorioaren ondoan). Posta elektronikoz ere bada matrikula egiteko aukera, edo bestela 943 00 43 40 telefono zenbakira deituta, 08:00etatik 19:00etara.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.