Gazte Egunak hartuko ditu Lezoko kaleak larunbatean
Karlos Saldise plazatik abiatuko dira 12:00etan herriko kaleetan barrena triki poteoa egiteko. Bazkal ostean olinpiadak izango dira nagusi.
Gazte Eguna ospatuko dute larunbatean Gazte Asanbladak antolatuta. Jaien egitarauaren barruan antolatu zuten iaz, baina “tarte gehiegirik ez dagoenez” jaietako egitarautik aparte antolatzea erabaki dute aurten. Eguerdian egin dute hiztordua, Karlos Saldise plazatik abiatuko dira 12:00etan herriko kaleetan barrena triki poteoa egiteko.
Bazkariaren txanda helduko da, ondoren, 14:30ean eta Saldise plazan bilduko dira. 165 gazte bilduko dira mahaiaren bueltan. Jandako guztia arintzeko, berriz, Kuadrilla arteko Olinpiadak antolatu ditu bigarren aldiz Lezoko Gazte Asanbladak. Aurretik antolatzen zituzten eta arrakasta handia bazuten ere bertan behera gelditu ziren iaz gazte asanbladak berreskuratu zituen arte. Probak iazkoen antzekoak izango direla esan dute antolatzaileek. Olinpiadetan 180 bat gaztek hartuko dute parte.
Aniztasuna nagusi
Olinpiadak amaituta, herri poteoa egingo dute Jaixkipe txarangak lagunduta eta Ingoaldu? taldearen dantzaldiarekin amaituko dute eguna Saldisen. Kopuruei dagokienean, iaz baino gazte gutxiago hartuko dutela parte bazkaran zein olinpiadetan azaldu du Aitor Salaberria Lezoko Gazte Asanbladako kideak, “jaien barruan antolatu genuen iaz eta errazagoa izan zuten gazte askok futbol partidak libratzea. aurten ordea, askok 15:00etan edo 17:00etan izango dituzte partidak eta ezingo dute, beraz parte hartu”.
Halere, aniztasun aldetik aberastu egin dela gazte eguna eta kuadrilla arteko olinpiadak gaineratu du Salaberriak: “Zerrenda begiratuta espero ez genituen gazteak ikusi ditugu izena eman da eta hori izugarri pozgarria da”. 
