Garagardoa izango da protagonista ostegunetik aurrera Lezon
Saldise plazak hartuko du hirugarrenez garagardo festa eta guztira hamalau zerbeza dastatzeko aukera izango dute lau egunetan bertaraino hurbiltzen direnek.
Garagardoaz gozatzeko aukera izango dute lezoarrek ostegunean hasi eta igandera bitartean Tiñelu elkartearen eskutik. Saldise plazak hartuko du hirugarrenez garagardo festa eta guztira hamalau zerbeza dastatzeko aukera izango dute lau egunetan bertaraino hurbiltzen direnek. Antolatzaileen hitzetan, “horietako batzuk bereziki kalitate handikoak izango dira”.
Edariarekin batera, jatekoak ere eskainiko dituzte Saldise plazan antolatuko duten garagardotegian. Ukondotxoak, saltxitxak, patata purea eta bestelako razioak ere ekainiko dituzte bertan.
Festa giroa eman Lezori
Hiru urte dira Tiñelu elkarteak Gargardo Festa antolatzea erabaki zuenetik, “ilusioz ikusi dugu aurreko bi alditan garagardo festak izan duen harrera eta mugitu due jende kopurua, eta aurten ere herriari festa giroa emate aldera lanean jarri gara Tiñelu elkartean”.
Ostegunean zabalduko dute azoka 18:00etan eta 00:30era bitartean izango da irekita. Ordutegi bera izango du ostiralean, eta larunbatean berriz 18:00etatik 02:00etara izango da zabalik. Igandean, berriz, 00:30ean itxiko dute.
Jateko eta edatekoekin batera zuzeneko musika ere izango da lau egunetan zehar garagardo festan, Jaixkipe txaranga eta Traband folk taldearen eskutik.
100 boluntarioen lana
“Hirugarren urtez jarraian, guztia pest da Gargardo Festako txorrotetatik garagardoa zerbitzatzen hasteko”, esan dute antolatzaileek, eta gogora ekarri dute garagardo festa posible egiteko 100 boluntario lanean ariko direla: “Eskerrak eman nahi dizkiegu guztiei”.
Lezo inguruko herritar guztiak ere gonbidatu dituzte garagardo festarekin bat egitera, “herritik herriarentzat egindako ekimena da eta ehrritarren artean harrera ona izango dute inguruetatik datozenak”. 
