Harro eta pozik. Horrela daude Atlantikaldiaren antolatzaileak, egindako lehen balorazioan. Bada zer hobetu, esan dutenez, baina jai biribila izan dela baieztatu dute.
Ion Collar eta Laura Landa, gaurko agerraldian
Era kualitatiboan eta kuantitatiboan, arrakastatsua izan da Atlantikaldia. Iritzi hori plazaratu dute gaur Ion Collar Errenteriako Udaleko Kultura zinegotziak eta Laura Landa Atlantikaldiaren zuzendariak. Hori esateko hainbat aldagai azaldu dituzte biek ala biek, baina nabarmendu dituzte herriko eragileen eta norbanakoen parte hartzea, horiek jaialdiari egin dioten ekarpena, baita kanpotik etorritakoekin izan den hartueman eta fusioa ere. Balio erantsitzat jo dute hori, kultura ezberdinen arteko fusioa. Hori Collarren eta Landaren iritzia; oraindik balorazio sakonagoak egin behar dituzte herriko eragileekin eta bestelako kultur taldeekin.
Eta Atlantikaldiaren izaera definitzen ari dela baieztatu dute jaialdia hurbil-hurbiletik antolatu eta jarraitu duten bi kideek. Publiko orokorra, familiak, izan dira aurreko ostegunetik igandera egin zen Atlantikaldiaren kontsumitzaile nagusiak, hau da, eguneko jarduerak aurten indartu egin direla, nahiz eta gauekoetan —kontzertuak batik bat— jende asko bildu den. Eta horren adibide, Herriko Enparantzako oholtzan izandakoek jaso duten erantzuna jarri dute—egunez izan dira batez ere bertan ekitaldiak—, izaera berezia eman dio agertoki horrek Atlantikaldiari.
Bisitarien kopuruetan sartuta, gehientsuenak Agirre Lehendakariaren plazako kontzertuek izan dituztela esan dute Collarrek eta Landak, hori jakina zen. Baina esan dutenez, dibertsifikatu egin da publikoa herrian zehar, udalerrian izan ziren jarduera gehienetara jende asko joan zen. Publiko kopuru aldetik, zenbaki orokorretan, 2014ko ediziotik aldaketa handirik ez dela izan adierazi, eta horren gaineko gogoeta egingo dutela jakinarazi dute, helburu baitute urtetik urtera jende gehiago hurbiltzea jaialdira. Ikerketa lana egingo dute ildo horretan, herritarren iritziekin, nola hobe daitekeen jakin ahal izateko.
2016ra begira
Agerraldian izan diren kazetarien buruan zegoen galderetako bat zen ea 2016an Atlantikaldiarik egongo ote zen. Collarrek nahiz Landak garbi utzi dute, kazetarien txanda iritsi aurretik, 2016an jaialdia egongo dela, eta nolakoa gainera.
Izan ere, orain arteko jaiaren mamiari muzin egin gabe —Errenteria-Oreretaren itsas iragana berreskuratu, herri izaera indartu, Atlantikoko kulturen berri izan eta elkartukea ahalbidetu—, Donostia 2016 hiriburutzaren eskutik berritasunak izango direla jakinarazi dute. Eta egitasmo zehatz baten berri eman ere: Donostia 2016ren itsas enbaxada ibiltaria izango den TOSTA egitasmoak herrian bukatuko du bidea, 2016ko Atlantikaldian; Europako aniztasun linguistiko eta kulturala bilduko dituen egitasmoa da TOSTA, eta Galizia, Gales, Irlanda, Eskozia, Frisia eta Kornuallesen zehar ibili, eta bertako aniztasuna jaso ondoren, udalerrian ukituko du azkenekoz lurra; edukiontzi sorta batean jasoko dute hori guztia, herriko plazetan ikusteko eta gozatzeko aukera izango dena.
Horrekin bakarrik, jada, 2016ko Atlantikaldia iristeko gogoa areagotu egiten da.
