Udalaren arte bilduma ezagutarazteko erakusketa inauguratu dute
Lau barrutietan izango dira ikusgai margolanak; Antxoko erakusketa zabalik da jada
Martxan da Arte Parte, Pasaiako udalaren arte bilduma ezagutarazteko helburuz antolatu duten erakusketa. Lehengo ostiralean inauguratu zuten erakusketaren zati bat, Antxoko kultur etxean.
Pasaiako Udalaren Arte Bilduma liburua aurkeztu zuten bide batez. Izan ere, aipatu liburuan -Zabaldiya bildumaren bigarren zenbakia da– bildu dituzte bildumako artelan guztiak, eta artelan horiek denak dira, hain zuzen ere, datozen asteotan barrutiz barruti erakutsiko dituztenak.
Antxoko erakusketa zabalik da jada, eta urriaren 4ra bitartean ikustekoa aukera izango da; San Pedroko erakusketa, berriz, ostiralean inauguratuko dute, udal aretoan, eta urriaren 11 bitartean mantenduko dute zabalik; Urriaren 2an zabalduko dute Donibaneko erakusketa, Victor Hugo etxean, eta azkenik, Trintxerpekoa, alkateordetzan, urriaren 9an.
Nabarmendu behar da erakusketa ez dela ibiltaria, eta barruti bakoitzean, bildumaren artelan ezberdinak ikusteko aukera izango dela.
Erakusketak bisitatzeko ordutegia, barruti guztietan, ondoko hau da:
Asteazken, ostegun eta ostiraletan: 18:30etik 20:30era.
Larunbatetan: 11:30etik 13:30era eta 18:30etik 20:30era.
Igandetan: 11:30etik 13:30era. 
