Helburuak beteta itzuli dira Txosteko kideak; bi partida jokatu zituzten. Heldu den urtean Gipuzkoan jokatuko da Txapeldunen Liga.
Txosteko Ekaitz Lasa sakean
Europako V. Llargues
Txapeldunen Ligan jokatu zuten joan den asteburuan Herbehereetan. Parte hartu zuten bederatzi taldeen artean Oiartzungo Txost taldea izan zen. Borrokatzea, ikastea eta itxura duina ematea zen Txostekoen helburua eta taldekideek adierazi dutenez, “hiru atal horiek oso ongi beteta itzuli dira”.
Bi partida jokatu zituen Txostek. Lehena Herbehereetako Team NL 1en kontra izan zen. Txosteko kideek kontatu dutenez, partida hasiera “bikaina” egin zuten oiartzuarrek eta markagailua estu eta berdinduta joan zen hasierako jokoetan; aurrena bana eta gero bina. Ondoren, bi jokaldi eztabaidagarri tarteko eta nederlandarren susperraldia eta gero, jokoak borrokatuak izan ziren, baina Team NL 1 nagusitu egin zen bai jokoan eta baita markagailuan ere. “Horrela, emaitzari dagokionez, Txostentzat guztiz positiboa izan ez arren, kide guztiak kontentu ziren emandako mailarekin eta egindako partidarekin. Kontuan izan behar da talde nederlandarra gero finalerako sailkatu zela, bera, maila handikoa zen”. 6-2 gelditu zen emaitza.
Jokamoldeari dagokionez, hainbat gauza, pilota jotzeko posturak eta eskutako babesak tarteko, beste lurraldeetako jokalarienekin konparatuta desberdinak zirenez, ikusleek zein aurkariek harridura erakutsi zutela azaldu dute.
Bigarren partida Old Stars (Herbeheretakoak ere) taldearen kontra izan zen: “Kasu honetan, Txostekoek ez zuten aukerarik izan, Old Starsekoak nagusi izan ziren jokoaren alor guztietan eta 6 eta 0 bukatu zen partida. Oiartzuarrek aurreneko partidan erakutsitako maila erakusterik ez zuten lortu, nahiz eta jokoren bat lortzea merezi izan zuten”.
Belgika txapeldun
Belgikako Kersken taldeak jantzi zuen Txapeldunen Ligako txapela, Team NL 1i 8 0 menderatuz. Hirugarren urtez jarraian lortu dute garaipena.
“Partidetan lortutako emaitzetatik harago, bidaia, gainontzeko herrialde eta taldeekin sortutako harreman estua zein bote luzeko txapelketa bera, guztiz positiboak izan dira. Taldearentzat esperientzia paregabea izan da, etapa berri baten hasiera eta etorkizunerako indarra emango duena”, adierazi dute Txosteko kideek.
Hurrengo txapelketa Gipuzkoan
Heldu den urtean Txapeldunen Liga Gipuzkoan jokatu da eta Oiartzunen partidaren bat edo beste jokatuko dute.
