Atez atekoa bertan behera uztea erabaki du udalak, herritarren kexa artean

Erabakia PSE-EEren eta EAJren aldeko botoekin atera da aurrera; Pasaiak Ahal Du-k eta EH Bilduk kontra bozkatu dute.

olatz mitxelena

2015/09/30

Lepo egon zen atzo pleno aretoa, eta luze jo zuen udalbatzarrak

Udal gobernuak aspalditik iragarritakoa bideratzeko lehen pausu ofiziala eman zuen atzo, San Markoko Mankomunitatea eta Pasaiako Udalaren arteko lankidetza hitzarmena aldatzea onartu eta gero. Honenbestez, atez atekoa bertan behera utzi, eta edukiontzien bidezko bilketa berrezarriko du udalak. Bosgarren edukiontzia gehituko dute oraingoan, boluntarioa eta giltzarekin. Erabakia, baina, oso eztabaidatua izan zen, eta interbentzio asko eragin zituen atzoko udalbatzarrean, talde politikoen ordezkarien aldetik lehenbizi, eta plenora bildutako herritarren artetik ondoren. “Erabaki legitimotzat” jo zuen Pasaiak Ahal Du-ren bozeramaile Lide Castellanok, baina “akordio ezin okerragoa” dela defendatu zuen. “Zentzurik gabeko erabakia” hartu ordez, “gauzak behar bezala egin” eta “alternatiba eraginkorrak” aztertzeko eskatu zuen. Bide beretik, bere taldeak proposatutakoa ez aztertu izana kritikatu zuten. Era berean, gogor kritikatu zuten zerbitzua San Marko Mankomunitatearen esku uzteko erabakia “Gutxiago birziklatu, gehiago ordaindu eta sistemaren kontrola galduko dugu” kexatu zen Castellano. Udaleko txosten tekniko guztiek gomendutakoaren kontra hartutako erabakia dela nabarmendu zuen, bere aldetik, EH Bilduk, eta sistema pribatizatzeko erabakia deitoratu zuen, gobernu taldeak “ezkutatu datuen” berri emanez. EAJk eta PSE-EE-k, berriz, beren erabakia politikoa dela defenditu zuten, “erabaki politiko, legala eta zilegia”, eta “herritarrek hauteskundeetan emandako mandatuari erantzutea helburu” duena.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.