Etxe kaleratzerik gabeko udalerria izango da Errenteria-Orereta
Aurrera egin zuen mozioak EH Bildu, PSE-EE eta Errenteria Iribaziz alderdien aldeko botoarekin. EAJk abstentzioaren alde egin zuen.
Etxe kaleratzerik gabeko eremuak lortu nahi ditu Kaleratzeak Stop Plataformak, eta horren harira, mozioa aurkeztu zuen atzo Errenteriako Udalbatzaren bilkuran. Aurrera egin zuen mozioak EH Bildu, PSE-EE eta Errenteria Iribaziz alderdien aldeko botoarekin. EAJk abstentzioaren alde egin zuen. Horrenbestez, etxe kaleratzerik gabeko udalerria izango da aurrerantzean Errenteria-Orereta. Alderdi politikoak plenoan gaia aztertzen ari ziren bitartean gainera, kaleratze bat bertan behera gelditu zela azto bertan jakinarazi zuen Nagore Basurto Errenteria Irabaziz taldeko zinegotzi eta Gizarte Zerbitzuetako arduradunak.
Joseba Salegi, Donostiako Kaleratzeak Stop plataformako kideak aurkeztu zuen mozioa. Eskerrak eman zizkion udalari, “ahotsa emateagatik. Izan ere aurreko astean Donostiako Udalean aurkeztu genuen mozioa eta ez ziguten parte hartzeko aukerarik eman”. Atzo Errenterian aurkeztutako mozioa, kanpaina baten barruan kokatu zuen Salegik, “Euskal Autonomi Erkidegoko EAE, udalbatza eta batzar nagusietan aurkezten ari gara, ahalik eta udalerri gehienak kaleratzerik gabeko eremu gisa izendatzeko”.
482 etxe kaleratze EAEn
Milaka direla euren maileguak edo alokairuen errentak ordaintzeko zailtasunak dituzten familiak, eta horiek guztiek administrazio publikoaren laguntza behar dutela esan zuen Salegik. Horren harira, tokiko administrazioek ezin dutela beste alde batera begiratu gaineratu zuen plataformako kideak: “Etxegabetzeen arazoa ez ad arazo sozial hutsa, iruzur itzela baizik, bai zentzu politikoan, bai ekonomikoan, zein juridikoan. Horregatik uste dugu herritarroi babes neurriak eman behar dizkiguzuela, eta etxebizitza eskubidea behingoz, benetako eskubidea izan dadin beharrezko bitartekoak jarri”.
Datuak ere eman zituen Salegik. Lakuako Gobernuak ateratako txostenari erreparatu zion horretarako, eta komunikabideettan kaleratzeen arazoa desgertu dela dirudien arren, 2014. urtean EAEn 720 etxegabetze prozdura abiatu zirela esan zuen. Aurten, lehen seihilekoan, berriz, 482 kaleratze izan direla gaineratu zuen Salegik.
Errenterian kaleratzerik ez azken lau urtean
Salegik eskerrak eman zizkion udalari eta Julen mendoza alkateari, “aurreko urteetan kaleratze prozesuen gainean egin duzuen bitartekaritza lanagatik”. horren harira azken lau urteetan Errenteria-Oreretan ez dela etxe kaleratzerik izan gaineratu zuen Kaleratzeak Stop plataformako kideak.
Kale garbiketa zerbitzua
Bestelako gaiak ere aztertu zituen plenoak atzoko bilkuran. Errenteriako kale garbiketa eta hiri hondakinak jaso eta garraiatzeko zerbitzua kontratatzeko proposamena izan zen horietako bat. Azken horrek ere aurrera egin zuen EH Bildu, Errenteria Irabaziz, eta EAJren aldeko botoekin. PSE-EEko zinegotziek kontra bozkatu zuten. 
