Oarsoaldeko udalek indarkeria matxistak eragindako azken hilketa gaitzetsi dute
Bat egin dute guztiek Oarsoaldeko Mugimendu Feministak bihar Errenteria-Oreretako Niessen merkataritza gunean 19:30ean deitu duen elkarretaratzearekin.
Lezo, Errenteria-Orereta, Pasaia eta Oiartzungo Udalek, Errenteriako Berdintasunerako Kontseilu eta Pasaiako Berdintasuna Mahaiarekin batera, gaitzetsi egin dute indarkeria matxistak atzo Erandion eragindako azken hilketa. “Publikoki eta aho batez adierazi nahi dugu emakumeenganako indarkeriaren aurkako gure jarrera, horrelako gertaerak ez ditugu onartzen gure gizartean eta horegatik lanean jarraitu behar dugu erakunde, elkarte eta herritarrak, emakumeak indarkeria matxistarik gabe bizi gaitezen”.
Elkarretaratzea bihar
Halaber, bat egin dute guztiek Oarsoaldeko Mugimendu Feministak bihar Errenteria-Oreretako Niessen merkataritza gunean 19:30ean deitu duen elkarretaratzearekin, eta eskualdeko herritar guztiak deitu dituzte bertan parte hartzera. Hildako emakumearen senideei elkartasuna adierazi diote, azkenik, lau udalek, Errenteriako Berdintasunerako Kontseiluak eta Pasaiako Berdintasun Mahaiak.
Lapurdiko Gixune herrian, berriz, gizon bat atxilotu dute 30 urteko bikotekidearen heriotzarekin zer ikusiaizan dezakelakoan. Igande goizaldean atzeman zuten 30 urteko Lehuntzeko emakumea Gixunen, zuhaitz baten kontra istripua izan zuen auto baten ondoan, lurrean. Larri zaurituta eraman zuten hospitalera eta bertan hil zen. Gertaturikoa ez dago batere argi, eta zendutako emakumearen bikotekidearen aurka ikerketa zabaldu dute. Azken hori, kartzelan sartu dute.
Gixuneko heriotza indarkeria matxista dela baieztatzen bada, protestara deituko du mugimendu feministak biharko. 
