Donibaneko aiton-amonen aterpeak antolatu du aurtengo proba, Gipuzkoako erretiratu eta pentsiodunen elkartearen laguntzaz
Aurtengo probarako prestatu duten elastikoa oparitu diote Izaskun Gomez alkateari
Urtero biltzen dira Gipuzkoa osoko erretiratuak ibilaldi neurtuan. Orain dela hogeita bost urte hasi ziren froga antolatzen, eta orduz geroztik urtero errepikatu dute zita. Antolakuntzaren lekukoa eskutik eskura pasatu ohi dute, herriz herri, eta XXV. Ibilaldi Neurtuaren antolakuntza, hilaren 17an izango dena, Donibaneko aiton-amonen aterpeari egokitu zaio.
Gaur eguerdian aurkeztu dute proba, udaletxean, Izaskun Gomez alkatea eta Gipuzkoako pentsiodunen eta erretiratuen elkarteko buru Jose Riviere bertan zela. Pasaiako gainontzeko erretiratuen elkarteetako ordezkariak ere izan dira aurkezpenean.
Azaldu dutenez, bi dira ibilaldi neurtuaren antolakuntzaren helburu nagusiak: Gipuzkoa osoko erretiratuak bildu eta elkar ezagutzea, eta zahartze aktiboa sustatzea.
Ibilbidea, bazkaria eta dantzaldia
Ibilaldiak badiari bira emango dio, Donibanetik irten, eta San Pedron bukatzeko. Guztira, zortzi kilometro pasatxo izango ditu ibilbideak, eta aurreratu dutenez, bidean zehar guztira, bost mahai izango dira, horietatik hiru kontrol guneak.
Meipin elkartuko dira autobusak, 09:45ean – 600 erretiratu inguru etorriko direla aurreratu dute– . Donibaneko Santiago plazatik abiatuko da ibilaldia, 10:00ak inguruan. Alde zaharretik Navalaldeara, eta handik Lezorako bidea hartuko dute erretiratuek. Lezon izango da, hain zuzen, lehen kontrol gunea. Errenteria-Oreretara, tren geltokia zeharkatuta sartuko dira, handik Iztieta pasatu eta Kaputxinoetara igoko dira. Antxora, Ibaiondotik sartuko dira eta bigarren kontrol gunea, Gure Zumardian izango dute. Buenavisitako gainetik bidegorria jarraituta Eskalerrillasera eta handik Trintxerpera jaitsiko dira, hirugarren kontrol gunera zeharkatzera. Ibilbidea San Pedroko frontoian bukatuko da.
Ibilaldia amaituta Trintxerpeko Ziriza etxean bilduko dira guztiak bazkaltzera, eta bazkaldu ondoren sari banaketa eta dantzaldia izango dela iragarri dute.
