Bosgarren edukiontzia erabiltzen duten bizilagunek %5eko hobaria izango dute tasan eta etxean konposta egiten duten herritarrek, %25ekoa.
![Collar eta Txasko](http://oarsoaldea.hitza.eus/site/files/2015/10/Collar-eta-Txasko.jpg)
Salbuespen batzuekin ordenantza fiskalak izoztea erabaki du gobernu taldeak. Zirkulazio zerga, zaborraren bilketaren tasa eta kiroldegikoak dira igoera izango dutenak, %2koa kasu guztietan, Jon Txasko Ogasun zinegotziak eta Ion Collar Kultura zinegotziak azaldu dutenez. Zirkulazio zergaren kasuan gainera, portzentajea progresiboa izango dela azaldu du Txaskok, eta horren arabera potentzia txikieneko ibilgailuei %1,5eko igoera ezarriko zaie eta handienekoei %2,5ekoa.
Zabor bilketaren kasuan ere igoko da tasa, baina bosgarren edukiontzia erabiltzen duten bizilagunek %5eko hobaria izango dute zergan, “edukiontzi hori erabiltzeak ingurumen onurak izateaz gain, zerbitzuaren urteko kostua 86.000 euroan gutxituko du egungo erabiltzaileekin”, esan du Txaskok. Egun 4.000 familik erabiltzen dute erregularki bosgarren edukiontzia, eta gutxinaka kopuru hori handitzen ari dela zehaztu du Ogasun zinegotziak. Bosgarren edukiontziaren erabilera sustatzea dago neurriaren atzean. Hobaria jasoko dute, halaber, etxean konposta egiten duten herritarrek, %25ekoa kasu horretan.
Etxebizitza hutsei, errekargua
Igoera izango duen azken tasa, kirol intsalazioetakoa izango da, %2koa kasu horretan ere. “Tasa igo arren, erabiltzaile berriak erakartzeko asmoz familia bonoa egiteko matrikula kostoa %30 jeitsiko dugu”, azaldu du Txaskok.
Ondasun Higiezinen Zerga izoztuta geratuko da laugarren urtez, eta gobernu taldeak etxebizitza hutsen gainean ezarritako errekargua berreskuratuko du. %100ekoa izango da etxebizitza hutsen gaineko errekargua, eta Txaskok eman dituen datuen arabera udalerriko 500 etxebizitzei eragingo die neurriak.
Jarduera ekonomikoak sustatzeko onartutako neurri fiskalak mantenduko dituela gobernu taldeak esan du bestalde, Collarrek, eta ingurumen arloko hobariak ere mantenduko direla.