Hilaren 22an Agustina Otaolak eta Munduko palista txapelduna den Maider Mendizabalek hitzaldia eskainiko dute 18:30etik aurrera Jose Luis Caso aretoan.

Agustina Otaola, alkatearekin
XX. mendean munduko kantxarik garrantzitsuenetan pilotan aritu ziren emakumeak omendu nahi ditu Errenteriako Udalak, eta horretarako,Bizkaiko Foru Aldundiak sortu duen erakusketa udalerrira ekarri du. Errenteria izango da Gipuzkoa mailan erakusketa hori antolatzen duen lehen udalerria, eta iniziatibaren bidez ezkutuan egon diren emakumeei errekonozimendua adierazi nahi diela gaineratu du udalak.
Aurtengo Mariasun Landa Sariei esker izan zuen udalak Agustina Otaola raketistaren berri: “Ainhoa Palomoren
Agustina Erraketista, bizitza frontoiari emana lana izan zen sariduna, eta emakumeen ahalduntzea eta errekonozimendua lortzeko bidean Fanderiako frontoiari Agustina Otaola Raketista Profesionala izena jarri genion. Emakume profesional baten izena duen munduko lehen frontoia da”.
Joan den uztailean berriz, Madalen Jaien barruan omenaldia egin zien udalak Agustina Otaola eta beste hainbeste raketistei, “hasitako ibilbide horren segida da oraingo erakusketa”, gaineratu dute.
Erakusketak bost atal
Sakea, Tanteoa, Kantxa, Kontrakantxa eta Hemen eta Orain dira erakusketaren atalak, eta XX. mendean munduko kantxetan raketistek izan duten presentziaren berri ematen du. Argazkiekin batera, erraketak, pilotak, jantziak eta kontratuak ere bildu dituzte erakusketan. Bihar zabalduko ditu ateak erakusketak Jose Luis Caso aretoan eta astelehenetik larunbatera 17:00etatik 20:00etara izango da zabalik.
Hilaren 22an gainera, Agustina Otaolak eta Munduko palista txapelduna den Maider Mendizabalek hitzaldia eskainiko dute 18:30etik aurrera erakusketa aretoan bertan.