Oarso Bidasoko bost ordezkari izango dira aurten Gipuzkoako Bertsolari Txapelketako final-laurdenetan
Mikrofonoa izango dute lagun bertsolariek Gipuzkoako Txapelketan ere
Urtea gorriz markatuta eduki dute Oarsoaldeko eta Bidasoko bertsolariek, Gipuzkoako Bertsolari Txapelketaren urtea baita. Maiatzean hartu zuten batzuk Donostiako finalera eramaten duen hari muturra, eta dagoeneko final-laurdenetan daude. Bost izango dira Oarso Bidasoko ordezkariak fase horretan: Oiartzungo lau, Alaia Martin, Jon Martin, Arkaitz Oiartzabal Xamoa eta Ander Lizarralde, eta Irungo bat, Manu Goiogana.
Orain bakoitza bere helburuarekin aterako da plazara. Alaia eta Jon Martinek finalean egon nahi dute, duela lau urte bezala, eta gainontzekoek final erdiak, behintzat, dituzte buruan, horrek eskubidea emango baitie Euskal Herriko Txapelketan parte hartzeko.
Galderak:
1. Nolakoa izaten ari da aurtengo Gipuzkoako Bertsolari Txapelketa?
2. Nola ari zara prestatzen txapelketa?
3. Zein helburu izango duzu eta noraino iristea espero duzu?
Alaia Martin
«Adierazteko gogoz nago; hori bertsotan ahalik eta garbien islatzea nahi dut»
Alaia Martin
1. Txapelketa polita doa, esperotako erritmoan. Orain estutzen joango gara gure artean.
2. Urtarriletik txipa txapelketan eduki dut, nire egunerotasunaren ardatza dela esango nuke. Ohikoa bada jarrera kritiko bat edukitzea eta arreta jartzea, txapelketan hori areagotu egiten da. Bestetik, saiatzen naiz errimategia lantzen. Gero gustatzen zait bai bizitzan eta baita bertsotan ere inspiratzen nauten gauzak egitea eta inspiratzen nauen jendearekin egotea; burua elikatzea. Horrez gain, bertso eskolak ere astean bitan egiten ari gara, egingo ditugun ariketa horiek lantzeko.
3. Duela lau urte bezala finalera berriro iristea nahiko nuke, pausoz pauso. Egun oso berezia eta gogoangarria izan zen finalekoa, eta berriro disfrutatu nahiko nuke. Adierazteko gogoz nago, eta adierazi nahi dudan hori bertsotan ahalik eta garbien islatzea. Ideia eta kanporatzen dudana ahalik eta bikienak izatea.
Ander Lizarralde
«Ilusioa egingo lidake Euskal Herriko lehiarako sailkatzeak»
Ander Lizarralde
1. Lehenengo fasean, tentsio handia izan nuen arren, nahikoa disfrutatu nuen, eta final zortzirenetan sentsazioa eduki nuen nahiko kikildua atera nintzela plazara.
2. Hiru modutara: bertso eskolara joan eta bertso lagunekin abestuz; etxean, bertsoak idazten eta mekanismo batzuk garatzen gero inprobisatu behar denean bertsoa ateratzeko; eta alderdi emozionala ere saiatzen naiz lantzen. Txapelketan erabakiorrena dela iruditzen zait hori: ez badituzu emozioak detektatu, kontrolatu eta bizi izan, ez du balio.
3. Sekula ez dut Euskal Herriko Txapelketan parte hartu, beti ateetan geratu izan naiz, eta ilusioa egingo lidake. Baina nik nahiko nukeena da bertso bakoitza disfrutatzen saiatu, ofizio bakoitza esprimitu eta ahalik eta hoberen egiten saiatu. Helburu hori lortuko banu, gero besteak etorriko dira. Ondo kantatzen duena pasatu egiten da.
Arkaitz Oiartzabal Xamoa
«Oraindik atera ez zaidan saioa ateratzea nahi dut hurrengo faseetan»
Arkaitz Oiartzabal ‘Xamoa’
1. Luzea izaten ari da. Hala ere, emandako mailarekin disgustura ez nago, baina ez zait tokatu saiorik guztiz pozik geratu naizenik. Emaitzak oso onak izan dira, baina sentsazio aldetik falta zait bertso saio hori aurkitzea.
2. Bertso eskola oinarria da, eta geroz eta garrantzia gehiago du norberak aparte egiten duen lanak. Nire kasuan, kantatzeaz gain, bilatzen ditut eragin desberdinak: pelikula bat, liburu bat, edo askotariko eraginak sortzen dizkidaten pertsonak.
3. Hurrengo helburuak finalerdietara iristea izan behar du. Nire kasuan finalerdietako saio horretan kantatzea litzateke, baita atera ez den saio hori egiten saiatzea ere. Horrek emango didan final batera sartzeko? Agian. Epaileek erabakiko dute.
Manu Goiogana
«Oraingoz, final erdietara pasatzea gustatuko litzaidake»
Manu Goiogana
1. Nire saioak kenduta ez dut asko jarraitu txapelketa. Saiatzen naiz txapelketa dosifikatzen ez gogaitzeko. Maiatzean hasi zen niretzat txapelketa. Lehen saioan oso pozik geratu nintzen, bigarrenean oso sentsazio txarrak izan nituen, eta oraingoan, final zortzirenetako saioan, gustura. Azken saioa ez zen erabat biribila izan, baina egoera kontrolatzeko gai izan nintzen.
2. Ordu asko sartuta. Txapelketa prestatzen otsailean hasi nintzen, baina etxeko lanak egiten lehenagotik. Maiz koadernoa hartu eta errimategia lantzen dugu, gogoetak idatzi… Bakarrik egiten den lanaz aparte, astean bitan elkartzen gara kantatzeko.
3. Finalerdietara iritsi nahiko nuke, oraingoz. Final-laurdenetara joango naiz nire saioa egitera, eta gustura geratzen banaiz finalerdietara pasatzeko helburua gertu egongo da. Nire saioarekin gustura geratzera irtengo naiz, eta ez banaiz pasatzen, horrekin geratuko naiz.
Jon Martin
«Azkeneko txapelketan baino erregularrago izan nahiko nuke»
Jon Martin
1. Txapelketaren mailari dagokionez, sailkapen fasean oso bertsoaldi onak ikusi genituen, eta final zortzirenetan batzuk esperotako baino maila baxuagoa egon da. Kontuan hartu behar da jende gehienarentzat fase ezerosoa dela, pasatu egin behar delako.
2. Hainbat bertsolari elkartzen gara Zamalbiden, eta elkarrekin kantatzen dugu. Horretaz aparte, normalean baino gehiago irakurtzen dugu, pelikulak ikusi…
3. Ahalik eta ondoen pasatzea eta bertso mailara ahalik eta gehien hurbiltzea. Azkeneko txapelketan, Euskal Herrikoan, baino erregularrago izan nahiko nuke ere. Bertsolari guztiek presioa sentitzen dugu, eta nire kasuan iraganak harrapatuta nago. Alegia, oso gazte iritsi nintzen Gipuzkoako finalera, eta urtero iritsi naiz finalera. Estatistiken arabera, finalean egon beharko nuke, baina ez lidake harrituko ere kanpo geratzea. Finalerdiak ere izan daiteke beste helburu bat, Euskal Herriko Txapelketan egoteko eskubidea ematen duelako, baina zalantzan dut beste txapelketa batean parte hartuko ote dudan.
Jon Martin Oarso Bidasoko lehena izango da abesten final-laurdenetan
Hilaren 25ean izango du saioa Errenteria-Oreretan .Final-laurdenetako fasea azaroaren 8an bukatuko da .Finala abenduaren 19an izango da, Donostian
Jon Martin
Gipuzkoako Bertsolari Txapelketa sartu da final-laurdenetan, eta asteburu honetan atseden hartu ondoren, hurrengo larunbatean, hilak 24, izango da fase horretako lehenengo saioa. Hor, ordea, ez da Oarso Bidasoko ordezkaririk izango. Fasea estreinatuko duen lehenengoa Jon Martin izango da, hilaren 25ean.
Hain zuzen, Errenteria-Oreretako saioan izango da Martin. Izan ere, txapelketak, Donostiarako bidaian,Oarso Bidasoan egingo duen geldialdi bakarra Errenteria-Oreretan egingo du. Saioa, 17:00etan hasiko da Agustina Otaola pilotalekuan.
Alaia Martin Zestoako saioan igoko da lehenengoz oholtzara txapelketa honetan. Hilaren 31n izango da hori. Ander Lizarralde eta Arkaitz Oiartzabal Xamoa, elkarrekin ariko dira azaroaren 1ean, Ormaiztegin. Azkenik, Goioganak, Eskoriatzan kantatu beharko du, azaroaren 8an.
Finalerdietan hemezortzi bertsolarirentzako tokia egongo da. Bost, final-laurdenetako saioen irabazleak izango dira, eta gainontzeko hamahiruak puntuazio onena lortzen duten sailkatuak. Final handia abenduaren 20an izango da Donostian, Illunben. Zortzi bertsolariren artean erabakiko da txapela nork jantziko duen.
Bertsolarien bidea
Final-laurdenetara sailkatzeko Oarsoaldeko eta Bidasoko bertsolariek bide luzea egin behar izan dute. Maiatzean, Gipuzkoa Bertsotan sailkapen fasea jokatu zuten, Gipuzkoako final zortzirenetan egon ahal izateko. Hor, aurrera egin zuten Lizarraldek (bigarren izan zen), Xamoak, Goioganak eta baita Haritz Casabalek ere. Azken horrek sailkapen fasean oso maila ona eman zuen, baina final-laurdenen atarian geratu da; puntu gutxi batzuengatik ez baitu aurrera egitea lortu.
Xamoa eta Goioganak zuzenean lortu zuten final-laurdenetako txartela bakoitzak saio bana irabazita (Azpeitia eta Elgoibarren, hurrenez hurren), eta Lizarraldek puntuetan egin du aurrera. Alaia nahiz Jonek bermatuta zeukaten final-laurdenetan egotea, azken bertsolari txapelketako finalean egon baitziren biak ala biak.
Datozen faseetako bertso saioren batera joateko sarrerak aurrez eros daitezke
www.bertsosarrerak.eus atarian.
Analisia, Iñigo Legorburu
Iñigo Legorburu
Izen gutxiagorekin izanak dirau
Aurtengo Gipuzkoako Bertsolari Txapelketari lehen begiratuan, edizio honetan izen ezagun gutxiago daudela konturatuko da bertsozalea: Aitor Mendiluzek, Uxue Alberdik, Amaia Agirrek, Iker Zubeldiak edo oraindik txapeldun den Aitor Sarriegik uko egin baitiote aurtengoan parte hartzeari.
Dena den, bertsolaritzaren mailak bere horretan dirau, eta tartean, gure Oarso Bidasoa eskualdeetako bertsolarien jarduna. Final-laurdenetan eskualdeko bost bertsolari izango ditugu, seigarrena izatera deitua zegoen Haritz Casabal pasaitarra juxtu-juxtu kanpoan gelditu ondoren.
Manu Goiogana irundarrak heldutasuna erakutsi du orain artekoan. Ariketa aldrebesetan ez erortzen ikasi eta zertzelada politak uzten asmatu du belaunaldi gazteagoen aurrean, sailkatze zein final zortzirenetako faseetan. Ander Lizarraldek, berriz, bere etsairik handiena garaitu behar izan du honaino iristeko: bere burua. Bientzat, hemendik aurrera datorkien guztiak sari bat izan behar du, egin beharrekoak eginda, gozatzeko tenorean daudelako.
Arkaitz Oiartzabal
Xamoa-ren kasuan, egunik onena izan gabe, ofizioa erakutsi du bere jardunean. Azeleragailurik zapaldu gabe aritu da puntuak pilatzen, baina bere benetako maila erakusten badu, finalaurrekoetan egoteko hautagai sendoenetakoa behar luke xenpelartarrak.
Jon eta Alaia Martin anai-arrebek, finalista status-a ez galtzea izango dute helburu, batez ere Jonek; 2003az geroztik hutsik egin gabe final guztietan aritu da. Euren bertsokerari beste estualdi bat ematen asmatuz gero, biek hala biek, finala eta txapela ez lukete urruti behar.
