Ostegunean ez da ezohiko plenorik izango
Egun horretarako elkarretaratzea zuen deituta LZP Lurraldearen Zatikako Planaren aurkako herritar taldeak elkarretaratzea 19:00etan. Ordu erdi beranduago plenora joateko asmoa zuten, zatikako planaren gaia landuko zelakoan.
Lezoko Udalak ohar bidez jakinarazi du ez duela ezohiko udalbatzarrik egingo ostegunean, eta ez duela deialdirik egin. Egun horretarako elkarretaratzea zuen deituta LZP Lurraldearen Zatikako Planaren aurkako herritar taldeak 19:00etan. Ordu erdi beranduago plenora joateko asmoa zuten, zatikako planaren gaia landuko zelakoan. Josu Pikabea taldeko kideak adierazi duenez, iraileko osoko bilkuran zatikako planaren gaineko puntua sartu nahi izan zuten, baina azkenean ez zuen gobernu taldeak eguneko gai ordenean sartu: “Kepa Garbizu alkateak ez ohiko plenoa deituko zutela hilaren 22an esan zuen eta bertan gaiaz hitz egiteko aukera izango genuela gaineratu. Hori plenoko aktan jasota egongo da eta aretoan ginen lagun mordoak ere entzun genuen”.
Batzorde informatiboarekin haserre
Pikabeak hilaren 15ean udaletxean batzorde informatiboa egin zutela zatikako planaren gainean hitz egiteko esan du, bestalde. “Atipikoa izan zen, ez zen inolako diktaminik egin”. Hogei bat herritar bildu zirela bertan alkatea, EAJ, EH Bildu, PSE-EEko zinegotziak eta idazkaria, eta hiru idatzi aurkeztu zituztela bertan gaineratu du. “EAJren alegazio zirriborroa, herritar taldeak plazaratutako galdera sorta eta sinadura bilketa jarri ziren mahai gainean”. Pikabeak salatu egin du batzordera gaiaren gaineko informaziorik gabe, txosten teknikorik gabe, eta egindako galderei erantzunik ez ziela eman alkateak, “nahiz eta denbora izan zuen prestatzeko, ez zuen landu gaia. Borondate falta ikusi dugu, daukaten ardurarekin oso larria iruditzen zaigu eta oso minduta atera ginen”.
Deialdi ofizialik ez
Kepa Garbizuk deialdi ofizialik ez duela egin esan du bere aldetik, “plenoan esango nuen 22an egingo genuela, baina beste data bat esatea nuen bezala.Kontua da pleno deialdiak idatziz eta udalaren zigiluarekin egin behar direla. Halakorik ez dago, beraz ostegunean ez da ez ohiko plenorik izango”. Zatikako planaren herritar taldea ez zen etzi plenora joateko deialdia egina zuen bakarra, Lezon Ondo Ai Gea taldeak ere deialdia egina zuen alkateari zuzenean galdetzeko atez ateko bilketa sistema galdeketarik egin gabe kentzeko asmoa ote duen udalak. Batzuk zein besteek ez dute aukerarik izango zatikako planaz edota atez ateko bilketaren gainean hitz egiteko, aste honetan behintzat.
