Dispertsioaren aurkako bizikleta martxa izango da igandean

Gurutzetik abiatuko da 10:00etan eta Ergoien, Altzibar, Karrika, Iturriotz, Ugaldetxo eta Arragua pasatuta, Doneztebe plazan bukatuko da.

eihartze aramendia

Oiartzun

2015/10/22

Bizikleta martxaren aurkezpena

Aurten ere dispertsioa bukatzeko eskatuko dute bizikleta gainean jarrita. Sarek antolatuta, auzoz auzo ibiliko da bizikleta martxa igande honetan, hilak 25. Gurutzetik abiatuko da 10:00etan eta Ergoien, Altzibar, Karrika, Iturriotz, Ugaldetxo eta Arragua pasatuta, Doneztebe plazan bukatuko da. Sareko kamisetak salgai egongo dira 5 euroan martxaren hasieran. Hauxe Sarek adierazi nahi izan duena: “Euskal Preso eta Iheslarien eskubide urraketak sistematikoa izaten jarraitzen du. Badira urteak Euskal Herrian baldintza politiko ezberdinak daudela, baina aukerak egon arren, errealitatea bereziki espetxean ez da aldatu. Presoak, bakartuta, jazartuta eta milaka kilometrotara ditugu. Senideen aldetik, zer esanik ez, astebururo milaka kilometro egin behar, ehunka euro gastatu behar, odoluste fisiko eta ekonomikoa. Zigor gehigarria, mendekuan oinarritua. Honekin amaitu behar da eta orain! askotan herritarroi gai potoloak iruditzen zaizkigu, eta politikarien esku uzten ditugu korapiloak aska ditzaten. Baina gure esku ere badago, badugu giltza. Senideei galdetuaz zer moduz dauden; gutunak idatziaz; gure lagun, lankide edota senideekin sakabanaketaren krudelkeriaz mintzatuaz… Mila modu daude, guztiak norabide berean, preso eta iheslarien etxeratzea azkartzea. Izan ere, gatazkaren amaiera, bakea eta elkarbizitza egonkortuko dira senide eta lagunak etxeratzen ditugunean. Horretarako, lehen urrats gisa, sakabanaketa amaitu eta gaixo espetxean dauden presoen askatasuna exijitzen dugu”.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.