Errigoraren saskiak prest daude Errenteria-Oreretan ere
Nafarroa hegoaldeko produktuak Euskal Herriko plazan kokatu, euskalgintzari bultzada ekonomikoa eman, eta herrigintzari ekarpena egitea du helburu Errigorak.
Atzo hasi zen Errigoraren kanpaina berria eta atzo arratsaldean bertan aurkeztu zuen Saretuz taldeak Arramendiko baratza parkean. Eragile eta norbanako ugarik egin zuten bat deialdiarekin Arramendi magalean, Nafarroa hegoaldeak propio dituen produktuak Euskal Herriko plazan kokatzeko, euskara ofiziala ez den zonaldeko euskalgintzari bultzada ekonomikoa emateko, eta herrigintza, auzolana eta nazio eraikuntzari ekarpena egiteko.
Bertan ziren besteak beste LABeko Oarsoaldeko arduraduna Maddalen Dorador, Orereta Ikastolako Zuzendari Josemi Zabala, Lau Haizetara Euskaltzaleon Topagunearen lehendakari Xixilio Maritxalar, Xenpelar AEK-ko kide Idoia Arbelaitz, Xabier Iragorri Zazpiak Bat harreman sareko kidea, ELAko ordezkaria, Oarsoirriak, Inazio Zapirain Guraso elkartea, EH Bildu eta EAJko ordezkariak, eta Saretuz taldeko kideak. Horiekin batera, norbanako mordoa.
Iniziatiba sozializatu eta sarea sortu
Saretuz taldeko Mikel Azkunek hartu zuen hitza aurkezpenean, eta eskerrak eman zizkien lehenik eta behin, Nafarroa hegoaldeko uzta, euskarari puzka lemapean abiatutako kanpaina berriarekin bat egiteagatik. Errigora proiektua duela hiru urte jarri zela martxan ekarri zuen gogora, eta Saretuz taldeak hasieratik hartu duela bere gain iniziatiba sozializatzea eta sarea sortzea gaineratu zuen, Azkunek. Emaitzekin berriz, “gustura” dago Saretuz.
Aurkezpena egiteko Arramendiko baratze parkea aukeratzea ausazkoa ez zela esan esan zuen, bestalde: “Nekazarien lanaren fruituak nondik sortzen diren ikusi ahal izateko eta auzolan jardunen lanak eman ditzaken emaitzak irudikatzeko aukeratu dugu”.
Familia argazkia aterata Gaztaño auzoko Bukagaitzen elkartu ziren Errigora kanpainaren harira bildutakoak. Bideoa ikusi eta Errigora proiektuaren ordezkariaren azalpena jaso zuten zuzenean bildutakoek.
Hazten doan proiektua
Orain hiru urte hasi zenean hiru nekazarik hartzen zuten parte Errigora proiektuan. Bi urte hauetan etengabe handitzen joan da kopurua, eta aurtengo kanpainan 15 dira parte hartzen ari diren nekazariak, Idoia Arbelaitz Xenpelar AEK-ko ordezkariak azaldu duenaren arabera. 50 euroan eros dezakete interesdunek Nafarroako produktuz osatutako Errigoraren saskia, eta ordaintzen duten kopuru horren %25 zuzenean jasoko du euskalgintzak.
Saretuzek sareak astinduko ditu saskiak saltzeko eta Azkunek azaldu duenaren arabera posta elektronikoekin osatutako 1.200 lagunen sarea baliatuko du. Horrekin batera AEK, Arkaitza, Langaitz, LAB eta Oereta Ikastolan saskiak eskatzeko aukera izango da. Jasotzeko puntua berriz, Lau Haizetara elkartea izango da.
