Epaitegiaren ebazpenari eusteko eskatu du EH Bilduk

PSE-EEk eta EAJk «gehien birziklatzen duten udalerriak ekonomikoki ito» nahi dituztela salatu dute, eta jasotzen dituzten zerbitzuen arabera ordaintzea eskatu

olatz mitxelena

Oiartzun,Pasaia

2015/10/23

EH Bilduko hautetsiak, Donostian emandako prentsaurrekoan

EH Bilduren kalkuluen arabera, Pasaiak 93.000 euro inguru gutxiago ordaindu beharko lizkioke urtero San Markoko Mankomunitateari hondakinen kudeaketa gastuengatik; Oiartzunek 60.000 euro gutxiago eta 36.000 euro gutxiago Lezok. Kalkulua, EAEko Auzitegi Nagusiaren sententziak ebatzitakoa aplikatuaz egin du koalizio abertzaleak. Hernanik, Astigarragak eta Usurbilek ere dagokiena baino gehiago ordaintzen ari direla salatu du koalizio abertzaleak. Atzo zabaldu zituen aipatu datuak EH Bilduk, Donostian, «EAJk eta PSE-EEk gehien birziklatzen duten herriak ekonomikoki itotzen jarraitzeko asmoa dutela» salatzeko. EH Bilduk azaldu duenez, EAEko Auzitegi Nagusiak San Markoko Mankomunitateko herriek hondakinen kudeaketa gastuak jasotzen duten zerbitzuaren arabera ordaindu behar dituztela ebatzi zuen uztailean, eta ez orain arte moduan, populazioaren proportzioaren arabera. PSE-EE eta EAJ, aitzitik, ez datoz bat epaitegiaren erabakiarekin, eta helegitea aurkeztu dute, EH Bilduren arabera, «herriak ez dagokien dirutza ordaintzen jarraitzera behartu, agonia luzatu eta gutxiago sortzeko ahalegina egiten dutenak zigortuta». Sententziaren aplikazioa Helegitea erabaki bitartean mankomunitateko abokatuaren bidez, «sententzia kautelarki aplikatzeko eskaria luzatu» dutela jakinarazi du, era berean, EH Bilduk.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.