Kirol instalazioak biziberritzeko proposamena aurkeztu dio udalak Itxasori
Beraungo estadioan espazioa era eranginkorragoan erabiltzeko hobekuntzak proposatu ditu udalak, eta galtzarabordako kiroldegia handitzea.
Beraungo estadioa biziberritu eta Galtzarabordako kiroldegia handitzeko proposamenak aurkeztu dizkio udalak gaur goizean Denis Itxaso Kirol diputatuari. Errenteria-Oreretan izan da gaur Itxaso, eta udalak datozen urteetan kirol azpiegituretan egin nahi dituen hobekuntzen berri eman dio. Instalazioak egoera eskasean daudela esan du udalak.
Beraungo estadioan espazioa era eranginkorragoan erabiltzeko hobekuntzak proposatu ditu udalak. Horien barruan, atletismo pistaren zoladura aldatzea, futbol zelaia luzatzea eta belar artifiziala aldatzea aurreikusi ditu udalak, “lehiaketarako espazio berri horrekin egungo eskaerari erantzun ahal izateko”. Estadioaren iparraldea estaltzea ere proposatu du, eguraldi txarra egiten duenean ere erabili ahal izateko eskola kirolerako eta kirol federaturako. Aldagelen estalkia ere handitu nahi du, harmailak guztiz ixteko eta markesina bat eraiki sarreran. Barneko banaketa aldatu, eta sistema elektrikoa zein kanpoko komun publikoak berritzea ere aurreikusi du. Beraungo estadioa biziberritzeko lanek 1.900.000 euroko kostua izango dute.
Galtzarabordako kiroldegia handitu
Bigarren proposamena Galtzarabordako kiroldegia handitzea da, eta indoor pista bat eraikitzea egungo pilaketari erantzuteko. “Galtzarabordako kiroldegia hartzen duen ibarraren hondoan egingo litzateke, eta entrenamenduko eta lehiaketako pistak izango lirateke gune nagusiak”. Halaber, rokodromoa jarri nahi du ale batean udalak. Bigarren proiektuak 1.500.000 euroko kostua izango du.
Kirolak batez ere sozializatzeko eta pertsonak balioetan hezteko, eta osasuntsu egoteko aukera ematen duela gaineratu du udalak, ” gizartearentzat ezinbestekoa da guztiok kirola egiteko aukera izatea ikustaraztea da asmoa, eta aukera horixe izango da gure herriaren bereizgarri”. 
