Torrekuara eta gune historikora bisita gidatuak antolatu dituzte
Ordubeteko iraupena izango du eta doakoa izango da bisita. Errenteriaren itsas iragana, garaiko harresi eta ateak, eta eraikin nobleak ezagutuko dituzte.
Bisita gidatuak antolatu ditu udalak Torrekua eta gune historikora, Errenteriaren ondare historikoa eta artistikoa ezagutarazteko asmoarekin hilaren 14a eta 15ean. Foru aldundiak sustatutako Ondarea bertatik bertara 2015 programaren barruan kokatuta dago iniziatiba, eta hiru asteburutan banatuta egingo dituzte bisitak.Ordubeteko iraupena izango dute, doakoak izango dira eta bisitan zehar Errenteria-Oreretaren itsas iragana, garaiko harresi eta ateak, eta eraikin nobleak ezagutuko ditu bisitariak. besteak beste, Zubiaurre Jauregia, kapitain Etxea, Morrontxo eta Torrekua dorretxeak eta Santa maria, Erdiko eta Goiko kaleetan dauden armarri eta blasoiak.
Hilaren 14koa Torrekua dorretxea ikusteko bisitaldia izango da eta bi bisita egingo dituzte bertara. Larunbatekoa 11:00etatik 12:00etara euskaraz egingo dute eta igandekoa ordutegi berean, gazteleraz. Bisita egin nahi dutenek, izena eman behar dute 943 44 96 10 telefono zenbakira deituta 8:00etatik 13:30era edo posta elektronikoa baliatuta, hilaren 11 baino lehen. Plazak mugatuak direla jakinarazi dute udaletik, eta bisitaldia egiteko beharrezkoa izango da taldea osatzea. 
