Elkartasun pausoak preso eta iheslarien alde
Abenduaren 27an egingo dute lasterketa, 11:00etan nagusia eta ordu erdi lehengo haurrena, eta plazatik abiatuta 6,5 kilometro egingo dituzte.
Elkartasun lasterketa egingo dute Oiartzunen euskal preso eta iheslarien aldeko eskubideak errespetatuak izan daitezen eskatzeko. Gaur eguerdian aurkeztu dute aurten laugarren aldia izango duen iniziatiba, eta gogora ekarri dute euskal preso eta iheslarien egoera larria dela: “herritik urrunduta daude, eta lasterketaren bidez elkartasuna adierazi nahi diegu”. Abenduaren 27an egingo dute lasterketa, 11:00etan nagusia eta ordu erdi lehengo haurrena, eta plazatik abiatuta 6,5 kilometro egingo dituzte.
Oiartzungo presoak urrunduta daudela eta astero astero senide eta lagunek bidaia luzea egin behar izaten dutela bisita egiteko nabarmendu dute elkartasun lasterketaren antolatzaileek, “elkartasun pauso hauen bidez distantzia hori murrizteko urratsa egin nahi dugu”. Eta preso eta iheslarien eskubideen defentsan lasterka jarraituko dutela gaineratu dute.
Izena emateko
Lasterketan parte hartzeko izena eman beharko dute interesdunek, eta horretarako hainbat puntu daudela nabarmendu dute: amazkar taberna, kiroldegia, eta web orria. Abenduaren 23a baino lehen izena ematen dutenek 8 euro ordaindu beharko dituzte, eta egunean bertan ematen dutenek, berriz, 15 euro. Haurren izena emateko epea beranduago zabalduko dutela jakinarazi dute, bestalde. Dortsalak abenduaren 26an 17:00etatik 20:00etara eta egunean bertan 09:00etatik 10:00etara jasotzeko aukera izango dute parte hartzaileek.
Lasterketaren aurreko edizioetan kamixeta teknikoak saldu zituztela esan dute, bestalde, eta lasterketan parte hartuko dutenei kamiseta horiekin ateratzeko deia luzatu diete, “norbaitek ez badu edo lehen aldiz aterako bada, egunean bertan erosteko aukera izango du”.
Lasterketaren gaineko blogean haren gaineko informazio guztia jasotzeko aukera dago. 
