Herri harresiak babestu ditu bostak
Epaiketa salatu eta auzipetuei babesa eta elkartasuna adierazteko epaiketak iraungo duen bi egunetan batzarra eta manifestazioak deitu dituzte 20:00etan plazan.
Hamarnaka herritarren babesa jaso dute gaur eguerdian Joakin Izagirre, Ramon Gaztelumendik, Xabier Iragorrik eta Ixiar Iñarra oiartzuarrek. Frantzian espetxeratuta dagoen Ramuntxo Sagarzazuri ere helarazi diote babes hori eta besarkada estua bidali diote Oiartzungo plazan bildutakoek. Izan ere hilaren 11 eta 12an Espainiako Auzitegi Nazionalak epaitu egingo ditu Izagirre, Gaztelumendi, Iragorri eta Iñarra. Sagarzazu ere auziperatuta dago baino ez dute momentuz epaituko espetxean dagoela eta.
Konponbiderako oztopo
Libre dinamikaren barruan, kamixeta laranjak jantzita eta bostak libre zioen pankartarekin azaldu dira plazan auziperatuak eta polizia operazio berean inputatu gisa deklaratzera deitu zituzten beste bost oiartzuarrak ere. Haien atzean, herritarrek babesa eta elkartasuna erakusten. Harresia irudikatu dute horretarako eta besotik helduta auziperatuekin batera azaldu dira herritarrak. Xabier Zabala mintzatu da eta epaiketaren salaketa irmoa egin du. Fiskalak urte eta erdiko kartzela zigorra eskatu du eta zortzi urteko inhabilitazioa Izagirre, Gaztelumendi, Iragorri eta Iñarrarentzat. Sagarzazuri berriz, 2 urteko espetxe zigorra eta 16 urteko inhabilitazioa. Herritarren eta Euskal Herriaren kontrako erasoa dela epaiketa esan du Zabalak: “Zoritxarrez ez da herri honek ezagutu duen lehen erasoa. Inoiz zilegitasunik ez badute izan ere, inoiz baino ulergaitzagoa egiten zaigu Euskal Herrian zabaldu den agertoki berri honetan halakoak sufritzen jarraitu beharra. herri honek duen konponbiderako nahia eta bide horretan hartutako konpromisoentzat oztopo besterik ez da”.
Euskal Herritarrek bezala, Oiartzuarrek ere bake justua eta konponbidea nahi dutela gaineratu du, eta halako eraso gehiagorik ez dutela onartuko gaineratu: “Herri honen aurkako erasoekin amaitzeko garaia heldu da. Konponbidearen alde gure alea jartzeko garaia da”.
Epaiketa salatu eta auzipetuei babesa eta elkartasuna adierazteko epaiketak iraungo duen bi egunetan batzarra eta manifestazioak deitu dituzte 20:00etan plazan. Txalo artean amaitu dute bost oiartzuarrak babesteko ekitaldia.
Aritxulegiko operazioa
Epaiketak 2014ko ekainaren 3an Guardia Zibilak martxan jarritako operazioa du oinarri. Terrorismoa goratzea egotzita, bost lagun atxilotu zituzten egun hartan Oiartzunen, eta beste bost deitu zituzten inputatu bezala deklaratzera. Seigarren lagun bat ere deitu zuen Guardia Zibilak, lekuko gisa.
Bost atxilotuak Madrilera eraman zituzten, eta hurrengo egunean libre utzi, epailearen aurrean deklaratu ondoren, epaiketa bitartean, baldintzapeko askatasunean.
Operazioan indar erakustaldia egin zuen Guardia Zibilak, eta Aritxulegiko Gudarien Basoa desegin zuen.
[nggallery id=151] 
