Hogeita hamar urte gehiago betetzeko prest
Gaztetxea 30 urtez bizirik mantentzeagatik eskerrak eman dizkiete bertatik pasa diren belaunaldi guztiei, eta baita zoriondu ere
Hogeita hamar urte bete ditu Antxoko gaztetxeak eta urteurrenak merezi duen moduan ari dira ospatzen gaur. Goizean hasi dute egun osoko festa Zumardian gazteek, antolatuta zituzten jokoekin. Bien bitartean, bazkaria prestatzen buru belarri aritu dira Ibaiondo pilotalekuan espero dituzten 200dik gorako lagunentzat. Kanpoaldean txahala erretzen ari ziren bitartean, barrualdean entsaladekin ari ziren. Menu beganoa ere prestatu dute gaurko gaztetxekoek inork aitzakiarik ez dezan izan urteurren borobila ospatzeko.
Egunerako bereziki ateratako kamixetak nonahi ikusi ahalko dira Antxon, eta horiekin bete da zumardia 13:00etan egin duten ekitaldian. Bertan, Gaztetxea 30 urtez bizirik mantentzeagatik eskerrak eman dizkiete bertatik pasa diren belaunaldi guztiei, eta baita zoriondu ere. Hori zen gaurko ekitaldiaren helburuetako bat, urteurrena ospatu, eta 30 urte luze hauetan gaztetxearen ibilbidean noiz edo noiz aritutako jendea biltzea.
Bazkariaren ondoren kantaldia izango dute pilotalekuan bertan, eta rock konntzertuarekin amaituko da festa. Los Zopilotes txirriaus, Altxatu eta Tximeleta plaza taldea eta DJ Txorimalo izango dira Ibaiondon. 
