Lezoko EAJk eta EH Bilduk bat egin dute udalerriaren lurren defentsan

Bi alderdiek Lurraldeko Zatikako Planari alegazio adostua aurkeztu diote Eusko Jaurlaritzan

2015/11/20

LZPren kontra egindako manifestazioa

Azkenean, adostasuna. Lezoko lur eremuen defentsan, horretarako oinarri Lezoko Plan Orokorra hartuta, bat egin dute EAJk eta EH Bilduk, udalean ordezkaritza duten bi talde politiko nagusiek. Eusko Jaurlaritzaren Lurraldeko Zatitako Planari (LZP) adostutako alegazioa jarri diote, LZPren barruan Lezorako prestatutakoak bertan behera uzteko eskatuz. Plan horrek udalerria ordenatzeko indarrean dagoen agiriarekin (Plan Orokorra) talka egiten duela iritzita, eta bi taldeen arabera herriko ordenazio agiriaren “marra gorriak” ukitzen dituelako, bat egin eta Jaurlaritzan alegazioa erregistratu dute, “handia da gure kezka”. Eta Lezo-Gaintxurizketa eremurako LZPn jasota dagoena bertan behera uztea exijitzen dute bi alderdiek: “Ez intermodalik, ez azalera logistikorik, ez herrian zeharreko errepide berririk Lezoko herrirako”. Alegazioa aurkezteko erabakiak, beraz, bi alde ditu. Bat teknikoa da (beheko PDFan ikus daitezke alderdi tekniko horiek), eta horrekin batera lotuta doa Lezoren defentsa, bigarren aldea, eta beharbada, denari zentzua ematen diona. Hala, bi alderdiek egindako oharrean agertzen denez, LZPren barruko egitasmo asko Lezo estrategikoa delako egingo lirateke; baina hori ez dela horrela diote bi alderdiek, “erabaki politikoz da Lezo estrategiko, ez berez. [LZPrekin) goitik behera aldatuko zaigu herria, eta ez dugu halako aldaketa bidezko egiten duten pisuzko argudiorik ikusi landu ditugun dokumentuetan eta izan ditugun bileretan”. Hori horrela, LZPk Lezori “ahalegin handia” eskatzen diola ziurtatu dute bi alderdiek, eta ahalegin hori egiteko jasotako argudioen pisua “eskasa” izan dela. Horretan ados zeuden bi alderdiak LZP lantzeko egin zen ezohiko plenoan, baina orduan, ez zen adostasunik izan. Orain bai. Alegazioa, txosten teknikoa

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.