Kontraesanak, legearen aldetik hutsuneak eta iruzurra atzeman ditu Eusko Jaurlaritzaren proposamen berrian.
Jexux Leonet, Oiartzungo alkatea
Eneritz Arbelaitz, Ingurumen zinegotzia
eta Iñaki Pikabea, Hirigintza zinegotzia
Oiartzungo Udalak alegazioak aurkeztu dizkio LZP Donostialdeko Lurralde Zatikako Planaren azken proposamenari. Horrez gain, kontraesanak, legearen aldetik hutsuneak eta iruzurra atzeman ditu Eusko Jaurlaritzaren proposamen berrian. LZPren prozesua 1997an hasi zen eta tartean hainbat eten izan ditu. Hasierako onarpena 2010ean eman zitzaion eta 20.000 alegazio baino gehiago jaso zituen.
Kontraesanei dagokionez, udalak honakoa adierazi du: “Ur berrien okupazioa ekidin behar dela dio, baina proposamen zehatzak ehunka hektarea okupatuz planteatzen dira. Ingurunearen berezko funtzioa nekazaritza eta lehenengo sektoreko erabilera direla dio, baina izugarrizko afekzioa proposatzen du lur mota horietan. Eta herri ereduak errespetatzen dituela dio, baina Oiartzungo kasuan, hirigintzako garapena izan dezaketen lurrak herriko Hirigintzako Plan Orokorrean markatzen direnak baino hiru bider gehiago dira”.
Hutsune eta iruzur aldetik, udalak ikusi duenez, Ingurumenarekiko Eraginen Ebaluaketako legedia ez du betetzen. Udalaren ustez, Jaurlaritzak ez du aplikatu arautegi berria eta hori egitea “iruzurra” dela dio. Ingurumen Ebaluaketa bera era “kalitate eskasekoa” dela iritzi dio, “ez baitu betetzen legez ezarritako eduki eta baldintzarik”. Hori horrela, ebaluaketa berriz egiteko eskatu du.
Beste hutsunea hirigintzan antzeman du udalak: “Lur gehiegi erreserbatzen ditu dokumentuak garapen urbanistikorako. 2010eko dokumentuan lurralde erreserbek udal gehienen kontrako alegazioak izan zituztenez, Jaurlaritzak kontzeptu berri bat asmatu du (hiri inguruko landa) praktika aurreko erreserbak mantentzeko”. Oiartzunen 270 hektarea izendatu dituzte gisa horretara.
Horrez gain, Hirigintza eta Hiri Inguruko Landa bezala, 1.000 hektarea izendatu dituzte Oiartzunen: “Kopuru ikaragarria da: Oiartzungo herri eredua zalantzan jartzen du eta HAPOn garapen urbanistikorako erreserbatutako eremuak hirukoizten ditu, Udalaren eskumenak urratuz. Bereziki, Ergoien, Karrika eta Gurutzen, HAPOarekiko hirigintza lurren diferentzia izugarria da: Gurutzen 3,5 hektarea HAPOn, 29 LZPn; Karrikan, 3 hektarea HAPOn, 10 LZPn; Ergoienen, 8 hektarea HAPOn, 15 LZPn”.
Gaintxurizketako plataforma logistikoa
Azken proposamenak Lezo-Gaintxurizketa polo logistikoa mantentzen duela eta, egitasmo hori bertan behera uzteko eskatu du udalak, ingurumen zein ekonomiaren aldetik “zentzurik ez” duelako.
Udalaren ustez, Gaintxurizketako plataformak beste ekonomia sektoreetan eta herritarren bizi-kalitatean eragin kaltegarriak izango lituzke: “Oiartzunen logistika sektorera bideratutako guneak baditugu, eta etekin ekonomiko txikia eta lanpostu gutxi sortzen dituela egiaztatu dugu”.
