Planak «herritarren parte hartze zintzoari bizkar» emateaz gain, «lobby-en ezkutuko aginteriari men» egiten diola uste dute; gaiaren gaineko bilkura berezia iragarri dute
EH Bilduko kideak, Trintxerpen, Portuko Plan Bereziaren balorazioa egiten
Kaiko Herrera Pasaiaren biziberritzerako «estrategikoa» dela argi du EH Bilduk, eta, kezka agertu du, Portuko Plan Bereziak «Pasaiaren eta pasaitarren etorkizuna hipotekatuko duela» sinetsita dagoelako. Koalizioaren ustez, «betiko interes ekonomikoei eta lobby-en ezkutuko aginteriari men» egiten dio planak, eta EAJ eta PSE-EE «horien zerbitzari leial eta menpeko agertzen» direla salatu dute, «Pasaia beste 50 urtetarako hipotekatu nahi duen plana txalotu, babestu eta aldeko botoa» emanez.
EH Bilduren ustez, «ez da kasualitatea» azken urteetan Eusko Jaurlaritzaren izenean portuko kontseilaria izan den Nahikari Otermin egun udaleko hirigintza zinegotzia izatea. «Beste edonon bateraezina dena, hemen normaltzat hartu nahi da», salatu dute.
Plan Bereziarekin, portuak «Kaiko Herreraren okupazioa bermatzen» duela uste du EH Bilduk, eremua « biltegi» gisa erabiltzen jarraitu ahal izateko. «Operazioa kolorez janzteko, zenbait hobekuntza estetiko egiten utziko duela agintzen du portuak, eta horretarako dirua, noski, beti bezala, beste instituzioek, herritarrek alegia, jartzen dute», deitoratu dute.
Parte hartzeari bizkar
EH Bilduren arabera, edonola ere, planak duen «okerrena», honakoa da: «Herritarren parte hartze zuzen eta zintzoan oinarritutako ahalegin handiari bizkar» ematen diola. Gogoratu dutenez, Herrera Herrira herri ekimenak landu zuen ordenazio proposamena, «herritarren eta talde politikoen artean eraikia», udalak bere egin zuen 2011n, ordenazio irizpideak bere eginaz.
Aitzitik, herritarren proposamena «interes ekonomikoen kontrakoa dela ulertuta, guztiz baztertu» nahi dutela salatu du EH Bilduk.
Biziberritze plan integrala
«Interes arrotz eta ezkutuen gainetik», Pasaiak biziberritze plan integrala behar duela defendatu du EH Bilduk, «bertako herritarrak erdigunean kokatuko dituena eta pasaitarrontzat bertan bizi eta lan egiteko aukerak irekiko dituena, gazteentzat bereziki».
Koalizioak, «Pasaiak behar duen eraberritze sakon eta dinamikoaren alde» lanean jarraituko duela adierazi du, eta bilkura berezia iragarri du, hilabete honetan bertan, bere oinarri sozialarekin herri elkarteen dinamikan bere ekarpena zein izan behar duen zehazteko.
