Herritar baten ekimenez Goiko Plaza izen ofiziala izango du aurrerantzean herriko pilotaleku zaharrak. Zaharberritze lanak egiten ari dira.
![Itxura hau hartzen ari da pilotalekua](http://oarsoaldea.hitza.eus/site/files/2015/11/goiko.plaza_.jpg)
Itxura hau hartzen ari da pilotalekua
Goiko Plazako frontoia izenarekin izan da ezaguna orain arte. Orain, Goiko Plaza pilotalekua da. Hau da, zegoen tokiaren izena, izen ofiziala, hartu du herriko pilotaleku zaharrak. Erabaki hori hartu du udalak, Allerru Pilota Elkarteko Joxemi Garmendiak egindako proposamenari men eginez.
Hori bakarrik ez. Azken egunetan pilotalekua zaharberritzeko lanak egin dira, eta besteak beste margotu egin dute. Eta margotze lan horietan historiarekin zehatz izateko erabakia hartu dute: Lezoko Andreone Udal Liburutegian dauden agirien arabera, frontoia 1926an eraiki zela dago jasota, 1928an beharrean. Hortaz, pilotalekuak izen berria eta eraikitze urte zehatza dauzka jarrita horma nagusiaren goialdean, bi laubururen artean:
Goiko Plaza, 1926.
Endaran eraikuntza enpresak egin ditu zaharberritze lan horiek. 28.143 euroko kostuarekin, aurretik esandako guztiez gain, atzeko aldea berritu dute langileek, eta kirol azpiegituraren egitura sendotu dute; goiko zati guztia garbitu dute aldi berean, goiko sarea eta euskarriak berritu dituzte pilotak bertan gera ez daitezen, eta frontisa eta ezker paretak ere itxura berritua dute.