Full Compliant estatusa lortu du udalak eta hala erakusten duen diploma jaso eskatutako baldintzak egoki bete dituelako.
Bengoetxea, Mendoza eta Legorburu
Nazio Batuetako Compact of Mayors (Alkate Ituna) iniziatibarekin bat egin du Errenteriako Udalak. 2014. urtean aurkeztu zuten iniziatiba hori Nazio Batuek eta helburua, Berotegi Efektuko Gasen (BEG) isurketak murriztea da, ahulguneak gutxitzea eta udalerri mailan klima aldaketari aurre egiteko ahaleginak areagotzea.
Udalsarea 21eko kidea da Errenteriako Udalala eta urteak daramatzala klima aldaketaren aurkako ekintzan aitzindari izateko lanean esan du Julen Mendoza alkateak. “Konpromiso horregatik, eta azken hamabi urtean egin dugun lanagatik hautatu dute gure udala Euskal Autonomia Erkidegoko beste bederatzi udalerrirekin batera
Compact of Mayors iniziatibaren kide izateko”. Urte hauetan guztietan egindako klima aldaketaren aurkako lanak izan du gainera bere saria,
Full Compliant estatusa lortu baitu udalak eta hala erakusten duen diploma jaso.
Europa mailan 90 udalerri dira Nazio Batuen alkateen Itunera atxikituta, eta horietatik hamalau dira
Full Compliant, “horietako hamar euskal udalerriak dira eta Errenteria da bat”, nabarmendu du Mendozak.
Egokitzapen plana egin behar
Mitigazio plana martxan du Errenteriako Udalak 2014ko maitzaz geroztik, isurketak gutxitze aldera. Hori da
Compact of Mayors iniziatibaren zutabeetako bat. Orain, mitigazio plan horri, egokitzapen plana gaineratu beharko diola esan du Niko Bengoetxea teknikariak, hori delako bigarren zutabea, egokitzapenarena. “Iniziatibaren bidez munduan lidergoa hartzen da tokiko erakunde txikiak daudelako, txikiek tiratzen badute errazagoa izango delako estatuak mugiaraztea. Etxetik hasi behar dugu lanean”. Ikusgarritasuna ere lortzen dela gaineratu du, “nola murrizten diren ixurketak, zein lan egiten ari den, esperientziak partekatzen dituztelako udalek bertan”.
Errenteriak aurtengo maitzean onartu zuela Energia Iraunkorrerako Ekintza Plana (EIEP) ekarri du gogora bestalde, Jose Cruz Legorburu Ingurumen zinegotziak, “emisio baxuen ibilbide orria definitzea zen helburua”. Hartutako konpromisoaren arabera, berotegi efektuko gasen emisioak gutxienez %20 murriztea da helburua 2007ko datuekin alderatuta. “Murrizketaren %81 etxebizitzen eremuari legokioke, %14a udalari eta %5a zerbitzuen sektoreari”, gaineratu du Legorburuk.
