Elkartasun elikagaiak, behar handiena dutenentzat
Janari bilketa egiten ari da gaur eta bihar Gipuzkoako Elikagaien Bankua Oarsoaldea eta Bidasoko supermerkatu handietan.
Janari bilketa egiten ari da gaur eta bihar Gipuzkoako Elikagaien Bankua Oarsoaldea eta Bidasoko supermerkatu handietan. Oarsoaldearen kasuan, Errenteria-Oreretako Eroskin eta Oiartzungo Alcampo eta Carrefour supermerkatuan ariko dira bilketa egiten gaur 21:00ak arte eta baita bihar ere 09:00etatik 21:00etara. Carlos Ortega Elikgai Bankuko boluntarioa Niessen Merkatalguneko supermerkatuan ari da biltzen jendeak emandako elikagaiak. Ez da bakarrik ari lan horretan. Errenteria-Oreretako Gurutzearen alabak ikastetxeak bere burua eskaini omen zuen bilketarekin laguntzeko, eta bertako ikasleak ari dira boluntario lanetan.
Etengabea da elikagaiz betetako poltsen joan etorria. Kontzientziatua dagoela jendea esan du Ortegak, “batzuk zuzenean eskatzen digute poltsa eskaini beharrik gabe, eta badakite ere zein elikagai biltzen ari garen. Alde horretatik erantzuna oso positiboa izaten ari da”. Esnea, kakaoa, gailetak, babarrunak, dilistak, garbantzuak, kontserba begetalak, atun latak, turroia, haurrentzako poteko janaria edo pardelak dira lehentasuna bilketan Elikagaien Bankuarentzat, “baina galkorrak ez diren bestelako elikagaiak ere hartzen ditugu”.
20.000 lagunentzako janaria
Iaz 9.000 kilo elikagai bildu zituzten Ortega gaur dagoen zentro berean, horien artean nagusiki esnea, arroza, olioa eta pasta jaso zituzten. Gizpuzkoa osoan berriz, 350 tona elikagai jaso zituzten bilketa egin zuten lehen urtean, 2013an Gabonei begira; iaz 576 tona, eta aurten kopuru horietan ibiliko direla aurreikusi du Ortegak. Izan ere, bildutako guztia biltegian jaso behar dute ondoren sailkatu eta banaketa egin ahal izateko, eta duten biltegiak lekua mugatua duela esan du. Iaz bildutako guztia berriz, 20.000 pertsonei jaten emateko balio izan zuen Gipuzkoan.
Gaur eta bihar jasotako guztia astelehenean sailkatuko dute boluntarioek. Hurrengo urratsa, Gipuzkoako udalerrietako elkarteei helaraztea da jasotakoa, “haiek banatzen dituzte gero elikagaiak udalerri bakoitzean beharra dutenen artean”.
