Errenteriarren ahotsak, bilduta

Ahotsak egitasmoaren barruan errenteriarrek egin duten ekarpenaren berri eman zuten atzo agerraldian

2015/12/02

Idoia Etxeberria Ahotsak egitasmoko kidea, Julen Mendoza alkatea eta Edurne Zabala, atzoko agerraldian

Ahotsak egitasmoaren barruan, 46 errenteriarren testigantza jasota dago. Egitasmoaren helburu nagusia da Euskal Herriko ahozko ondarea eta herri hizkera bildu eta hedatzea, “lehen sukaldeetan, su ondoan egiten zen hori jasota gelditzea”, esan zuten atzo herriko ahotsak aurkezteko egin zuten ekitaldian egitasmoaren arduradunek. Hori, Errenteria-Oreretan, adineko 46 pertsonen testigantzak bilduz egin dute, eta horiek 1.242 pasarte eta 1.087 bideorekin jaso dituzte. Transkribatutako uneak 110 dira orotara. Edurne Zabala errenteriarra arduratu da lan hori guztia egiteaz herrian. 2010ean jasotakoak izan ziren testigantza gehienak, eta esan zuenez, horiek jasotzeko etxeetako ateak zabalik izan zituen, eskerrak eman zizkien harrera egin zioten herritarrei eta haien senitartekoei, “jarrera irekia izan dute nirekin, eskuzabala”. Testigantzetan, gehienbat, herriaz, eta herriak izandako aldaketetaz mintzo direla protagonistak esan zuen atzoko agerraldian Zabalak, nola garai batean herria lantegiz betea egon arren, baserri giroa ere bizi zela, eta herritarrek elkar laguntzeko beti etxeetako ateak zabalik zituztela. Eta industrializazioak herriaren izaeran eta itxuran izandako aldaketen gaineko iritziak ere badaude testigantzetan, eta nola bertakoek jakin uzten elkarbizitza modu berriak sortzen, bizitza soziala indartuz, nahiz eta batzuetan aldaketa horiek galera bezala sentitu bertakoek. Testigantza horiek guztiak Ahotsak-en webgunean ikus eta entzun daitezke. Eta bertan parte hartu dutenei eskerrak emateko, Jose Luis Maritxalarrek idatzitako bertsoak kantatu zituen atzo Zabalak. Ondoko bideokoak dira.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.