Obrak bitartean 228 aparkaleku plaza berri egokituko dituzte, eta egoiliarrentzako aparkaleku sistema bertan behera geratuko da
![Luzuriaga](http://oarsoaldea.hitza.eus/site/files/2015/03/Luzuriaga2.jpg)
Asteazkenean hasiko dira Pasai Antxon Luzuriagako aparkalekua berritzeko lanak. Obrak bitartean aurreikusten diren aparkatzeko arazoak arintzeko, udalak behin behineko 228 aparkaleku plaza berri atonduko dituztela iragarri du.
Honako leku hauetan egokituko dituzte aparkaleku horiek: 132 plaza Luzuriagako zelaiaren inguruan, jaietan bezala; 44 plaza Usozeko zelaian, Pasaia-Lezo Lizeoaren eraikinaren ondoan; eta azkenik, bertakoentzako 52 plaza gauez bakarrik aparkatzeko (20:00etatik 8:00etara) Biteri plazan.
Biterin egokitu den eremuan gauez bakarrik aparkatu ahal izango da; gainerako eremuetan – Luzuriagako zelaiaren inguruan eta Pasaia Lezo Lizeoaren ondoko eremuan– egunez nahiz gauez aparkatu ahal izango dute bertakoek eta kanpotik datozenek.
Hiru aste
Aurreikuspenak beteko balira, lanak hiru asteko epean bukatuko dituzte. Euria egingo balu, berriz, denboran gehiago luzatzea litekeena da.
Lurra asfaltatu, euri urak kanalizatu eta argiztapena hobetuko dutela jakinarazi dute.
Lanen ondoren aparkalekuak 400dik gora plaza izango dituela aurreratu dute.
Lanen aurrekontua 171.000 euroko da.