Hiru ibilbide bildu dituzte gidan adin guztietako pertsonei begirakoak. Altamiran kokatzen da horietako bat eta oinez zein bizikletaz egiteko aukera ematen du. Beste biak berriz Jaizkibelen barrena egitekoak dira
Lezoko Ibilbideak egitasmoaren aurkezpena
Lezoarren bizi kalitatea hobetzea da udalaren helburua eta baita Lezok duen ondare historiko-kulturala zein naturala ezagutaraztea ere Kepa Garbizu alkateak esan duenez. Bi helburuak biltzen dituen egitasmoa aurkeztu dute gaur Garbizu berak, Mikel Arruti aurreko legealdiko Euskara eta Kultura zinegotziak, Aitor Thalamas Lezoko Osasun Zentroko zuzendariak, Lander Zurutuzak eta Ingurumen, Kirola eta Kultura teknikariek. Harro eta pozik azaldu da Garbizu, “halako egitasmoak ez ditugulako egunero esku artean”. Lezoarren osasuna hobetzea bilatzen duela
Lezoko ibilbideak egitasmoak, baina horrekin batera lezok duen aberastasuna ezagutzera ematea ere baduela helburu egitasmoak azaldu du alkateak: “Naturarekiko errespetuzko jarrera ere bultzatu nahi dugu. Azkenean, udala ahalegin berezia egiten ari da Jaizkibel babesteko eta Lezoko landa eremua ezagutzera emateko”.
Hiru ibilbide bildu dituzte gidan adin guztietako pertsonei begirakoak. Altamiran kokatzen da horietako bat eta oinez zein bizikletaz egiteko aukera ematen du. Beste biak berriz Jaizkibelen barrena egitekoak dira, lehena Xoxolurra alarguntza 11 kilometroko ibilbidea da eta mendiaren hegoaldeko magala zeharkatzen du; bigarrena, berriz, Olazar Lorbide ibilbidea da, 4,5 kilometro ditu eta aurrekoa bezala oinez egitekoa da. Orain aurkeztu duten emaitza, aurreko legealdian hasi zen lantzen udala.
Elkarlanean egindakoa
Elkarlanean egindako egitasmoa izan dela nabarmendu dute aurkezpenean hitza hartu duten guztiek, udaleko departamendu ezberdinak izan dira egitasmoaren atzean lanean, eta oinarria berriz, Joxe Mikel Garmendia eta Lander Zurutuzak 2005. urtean argitaratu zuten
Lezoko ibilbide pedagogikoak izan dela esan du Arrutik. Ibiltzen hasi eta paraje benetan politak direla Lezon, eta ibilbideen gida esku artean izatea benetan pozgarria dela gaineratu du Arrutik.
Zahartzaro aktiboa aurrera emateko ezinbestekoa dela programa esan du bere aldetik Thalamasek, eta udalarekin zubiak eraikitzen hasteko bidea urratu duela egitasmoak gaineratu du Osakidetzaren ordezkariak.
Bi panel informazioarekin
Ibilbideekin, zein bizimodu aktiboa izateko gomendioak biltzen dituen bi panel kokatu dituzte Lezon. Bata Bekoerrota kiroldegiaren sarreran dago, hura da nagusiena, bestea berriz, Xoxolurran jarri dute. Ibilbideak biltzen dituen eskuorria berriz, ez dute momentuz lezoarren buuzoietan utziko, “udal eraikinetan eta Oarsoaldearen turismo agentzian izango dira nahi duenak har ditzan”. Udaberriarekin batera banatuko dituzte gidak lezoarren buzoietan, orduan egingo baitute egitasmoaren gaineko aurkezpen zabalagoa. Gizarteratze fasea egingo dute orduan, eta horri begira hainbat ekintza antolatu dituzte jada. Ibilbide gidatuak antolatuko dituzte udaberrian bertan hasita herritarrentzat zein kanpokoentzat ibilbideak aurkeztu eta ondare historiko naturalaren berri emateko, eta udalerriko ikastetxeentzako tailerrak. Argazki rallya ere nahi dute egin, parte hartzaileen argazkiekin erakusketa antolatzeko.
Bien bitartean ibilbideen informazioa Lezoko udalaren
web orrian kontsulta daiteke.
