San Silbestre lasterketarako, boluntario bila
Dortsalen banaketan, egun berean muntai lanetan, ibilbidean, bidegurutzetan, seinalitika egiten, eta anoa puntuetan egoteko presta dagoen jendea behar du taldeak.
San Silbestre lasterketan laguntzeko boluntario bila ari da Errenteriako Atletismo Taldea. Dortsalen banaketan, egun berean muntai lanetan, ibilbidean, bidegurutzetan, seinalitika egiten, eta anoa puntuetan egoteko presta dagoen jendea behar du taldeak. Interesdunek EATren webgunan eman dezakete izena, baldintza bakarra 16 urtetik gorakoa izatea da. Laguntzaileek gainera lasterketaren kamiseta jasoko dute.
500 dortsal baino ez direla gelditzen urte zahar eguneko lasterketarako jakinarazi du bestalde atletismo taldeak, “inoiz baino azkarrago doa salmenta”. Guztira 1.000 dortsal atera dituzte lasterketarako eta dagoeneko erdia saldua dute antolatzaileek eta lasterketan parte hartu nahi dutenei izena eman, eta dortsala ahalik eta azkarren eskuratzeko gomendatu diete.
Aurtengo ibilbidearen barruan 3,5 kilometroko ibilbidea nabarmendu dute atletismo taldekoek, “familiei bide bat ireki die beste modu batean lasterketaz gozatzeko”. Ibilbidean aldaketa izan dela gogorarazi dute halaber, eta aurtengo edizioan Fanderia auzoaren barrualdetik igaroko da lasterketa, etxeen artean. 
