'Mari Domingiren ihesaldia', ipuin musikatu solidarioa
Emanaldia doakoa izango bada ere diru bilketa egingo dute Bekoerrotan, eta bildutakoa Caritasi emango diote behar gehien duten lezoarren artean banatzeko.
Tomas Garbizu Musika Eskolak antolatu duen Gabonetako egirarauaren barruan, Mari Domingiren ihesaldia ipuin musikatua oholtzaratuko dute datorren asteartean (hilak 22) 19:00etan. Musika eskolak berak, Murixka Dantza Taldeak eta Irungo Azahar sevillana dantzariek elkarlanean egin dute ipuina, eta Xanti Espina musika eskolako zuzendariak azaldu duenez, “originala, entretenigarria eta berritzailea da, eta Bekoerrota Kiroldegira hurbiltzen direnek ongi pasako dute, ziur”.
Ipuin musikatua adin guztietako ikusleei zuzendua dagoela esan du Espinak gaur eguerdian egin duten agerraldian, “oholtza gainean 6 urtetik 70 urtera bitarteko protagonistak izango dira”. Musika eskolako talde korala, Sutargi eta talde instrumentala, Murixka Dantza taldeko dantzariak eta Azahar sevillana dantzariak izango dira batera, “150 lagun guztira”.
Gabonetako kutsua izango du ipuin musikatuak eta horrekin batera emakumeari protagonismo berezia emango diola gaineratu du Espinak: “Mari Domingi da protagonista eta kondaira errespetatuz, ikuspegi modernoa eman nahi izan diogu. Azken aldian horren modan dagoen Andaluzia eta Euskal Herriaren arteko istorioa da. Mari Domingik Santomas egunean andaluziar bat ezagutu eta Sevillara joango da, hori da ipuin musikatuaren haria”.
Bildutako dirua Caritasi
Ipuin musikatua solidarioa ere izango da. Izan ere, sarrera doakoa izango bada ere diru bilketa egingo dute bertan, eta bildutako hori guztia Caritasi emango diote ondoren Lezon behar handien dutenen artean banatzeko. Kepa Garbizu alkateak, Espinak berak bezala herritar guztiak animatu ditu bat egin eta lanarekin disfrutatzera. 
