2015ean indarkeria matxistagatik zortzi salaketa jarri dituzte Oiartzunen
Indarkeria matxistari aurre egiteko protokoloa osatzen ari dira udala eta herriko mugimendu feminista.
Indarkeria matxistak 2015ean Oiartzunen utzi dituen hainbat datu eman ditu udalak. Iaz, indarkeria matxistagatik zortzi salaketaren berri izan zuen udalak, eta 27 emakume oiartzuar bizi dira euren erasotzaileengandik babesteko neurri judizialekin, urruntze aginduekin zehazki. Udalak nabarmendu du datu horiek eurengana heldu direnak izan direla.
Datuak ematearekin batera, indarkeria matxistaren biktima diren emakumeei salaketa jartzeko eskaera egin die udalak. Baita ematen duen laguntzaren berri eman ere: Udaltzaingora edo Gizarte-Ongizatera joan daitezke, horietan laguntza jasoko dute. Babes ekonomikoa, larrialdirako harrera zerbitzua, laguntza psikologikoa nahiz orientazio juridikoa jaso ditzakete emakume horiek.
Zentzu horretan, udalak adierazi du edozein emakumek jasan dezakeela indarkeria matxista. Horrela, 2015ean laguntza eskatu zutenen artetik erdia baino gehiago 40 urtez azpiko emakumeak izan ziren, horien familia egitura askotarikoa izanik. %82 bertakoak izan ziren, %18 atzerritarrak.
Hori horrela, Feminismo eta Gizarte-Ongizate arloetatik eraso matxisten biktima diren emakumeei laguntza emateko protokoloa ari dira diseinatzen elkarlanean udala eta herriko mugimendu feminista. 
