Kulunkan proiektua aurkeztu dute Antxoko ikastolan

Hizkuntza ohituretan eragitea da Kulunkan proiektuaren helburua, eta familiak eta ikastola elkarlanean jardungo dute

Oarso Bidasoko Hitza

2016/01/15

Atzoko aurkezpenaren une bat

Atzo, hilak 14, Kulunkan proiektuaren aurkezpena egin zen Pasaia-Lezo Lizeoaren Antxoko ikastolan, urtebetekoen geletan. Hizkuntza ohituretan eragitea da proiektuaren helburua, modu xumean baina eraginkorrean, eta familia eta ikastola elkarlanean arituz. Hots, euskarari, modu kontzientean, egunero leku pixka bat gehiago ematea, eta seme-alabek ikustea gurasoek euskarari ematen dioten garrantzia, familia bakoitzaren ezagutzatik eta errealitatetik abiatuta beti ere. Lizeotik esan dutenez, helburu xumeak, bai, baina xumetasun horretatik abiatuz, “urrats txikiak egitea, norberaren eskura daudenak” dute asmo. Proiektua Ebete elkarteak dinamizatuko du, eta atzoko aurkezpenean, hain justu, Ebeteko Iñaki Eizmendik urrats txiki horietako batzuk aurkeztu eta aipatu zituen; hala nola, euskara erabiltzen dutenek, bere horretan jarraitzea; euskara jakin baina gaztelera erabiltzeko joera dutenen kasuan, euskara gehiagotan erabiltzeko egoerak sortzea eta konpromisoak hartzea; mintzatu ez baina euskara ulertzen dutenen kasuan, beraiengana euskaraz zuzentzera animatzea… Lizeotik adierazi dutenez, atzoko bilera giro goxoan egin zen, eta gurasoek eta hezitzaileek, hain zuzen, egingarritzat jo zuten egitasmoa. Ikastolako hezitzaileek ere modu aktiboan parte hartuko dute, eta haiek ere materiala jaso zuten atzokoan. Kulunkan proiektuak hiru ikasturteko iraupena izango du. Ikasturte honi dagokionez, martxoan hurrengo urratsa egingo da. Ekainean, aldiz, balorazioa egingo da, eta proiektua egokitu eta zabaltzeko aukerak aztertuko dira.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.