Hiit eta Core, Galtzarabordako kiroldegiaren eskaintza berriak
Kirolkidek antolatuta Indoor Triatloiaren laugarren edizioa egingo dute Fanderiako kiroldegian hilaren 30ean.
Urte berriarekin batera bi kirol jarduera berri abiatu ditu Galtzarabordako kiroldegiak, Hiit eta Core. Kirolkide Ekintzak abonuaren barruan eskaintzen dituzte eta jarduera lasterrak dira. 30 minutuko iraupena du saio bakoitzak arduradunek esan dutenez. Hiit jarduera astelehenero egingo dute 14:45ean, kardio entrenamendua da eta intentsitate handiko tartekatutako ariketak egingo dituzte bertan.
Core jarduera asteazkenetan egingo dute 14:45etik aurrera, eta barne abdominalak lantzea du helburu. Bi jarduerak osagarri eszin hobeka direla edozein entrenamendurako gaineratu dute arduradunek.
IV Triatloi Indoora
Bestalde, Kirolkidek antolatuta Indoor Triatloiaren laugarren edizioa egingo dute Fanderiako kiroldegian hilaren 30ean. Bazkideek izena ematea dute jada, eta bazkide ez direnek, berriz, hilaren 25etik aurrera eman ahalko dute probarako izena. Hiru kategoria ezberdinetan parte hartzeko aukera izango dute interesdunek: gizonezkoetan, emakumezkoetan edo taldekakoan. Bakarkako izen emateak 5 euro balio ditu eta taldekakoak 12 euro. 
