Errenteria Irabaziz-ek "klientelismo politikoa" bilatzea leporatu dio PSE-EE-ri

Errenteria Irabaziz-eko zinegotziek esan dute udalerriko eragile eta elkarteek euren lana egiteko baldintza egokiak eta bitartekoak izan ditzaten egunero lanean dihardutela

Ikerne Zarate Gartziarena

Errenteria-Orereta

2016/01/19

Errenteria Irabaziz-en hautagaiak hauteskunde aurreko agerraldi batean

Errenteria Irabaziz alderdiak salatu du “klientelismo politikoa” bilatzen duela PSE-EEk. Alderdi sozialistak prentsa oharra bideratu zuen komunikabideetara aurreko astean, jakinarazteko Eusko Jaurlaritzak Errenterian hainbat ekintza garatzeko 84.000 euroko ekarpena egingo zuela. Ekarpen hori PSE-EEren kudeaketari esker izango zela posible adierazi zuen bertan, eta horren harira egin ditu adierazpenak orain Errenteria Irabaziz alderdiak: “Gustu txarrekoa da udalerriko hainbat elkarte PSE-EE eta EAJren negoziazioaren ondorioz onuradun izango direla esatea, eta horien izena ematea. Badirudi elkarte horiek esker ona azaldu behar diotela alderdi sozialistaren negoziaziorako trebetasunari”. Elkarte horiek guztiak, gainera, Errenteriako Udalaren aurrekontuetatik diru zatia jaso dute, “EH Bildu eta Errenteria Irabaziz alderdien aldeko botoei esker, bi alderdi horiek onartu baitituzte aurrekontuak”. Errenteria Irabaziz-ek ez diru zati horiek alderdi jakin baten “negoziaziorako trebetasunari” esker emandakoak direla ez duela inoiz esango gaineratu du. Errenteria Irabaziz-eko zinegotziek jakinarazi dute egunero lanean dihardutela udalerriko eragile eta elkarteek euren lana egiteko baldintza egokiak eta bitartekoak izan ditzaten, alderdi horrek “alkatea eta EH Bilduko zinegotziek bezala. Ez dugu inoiz esker onik eskatu ezta eskatuko ere, ezta txaloak ere, gure lana guztiona eta guztiekin egindako Errenteria delako”. Azkenik, politika zaharren eskeman aritzea leporatu dio alderdi sozialistari Errenteria Irabaziz alderdiak: “Giza kolektiboak eta elkarteak tresna huts gisa erabiltzen dituzte aurreikusitako etekin politikoen mesedera, edo gobernu taldea kritikatzeko. Zorionez Errenteriak beste garai bat bizi du, baita udal politika egiteko beste moduak ere”.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.