Txarangada, Inauteriei ekarpen koloretsua
Oarsoirriak taldeak Inauteriei ekarpena egiten jarraitu nahi du. Bi urtez batukada antolatu ostean, txarangada du hurrengo helmuga, aisialdi hezitzaile, euskaldun eta parte hartzailea sustatzea helburu duen taldeak.
Txarangada, Errenteria-Oreretako Oarsoirriak taldeak diseinatu duen azken ekintza da, eta Inauterietarako dena prest izan nahi dute. Izan ere, otsailaren 6an, doinuz eta kolorez bete nahi dituzte udalerriko kaleak txarangadaren bueltan biltzen diren haur eta gurasoek, eta horri begira entsegua egingo dute etzi Merkatuzarreko Jose Luis Caso aretoan 17:00etatik 19:00etara. Andoitz Antzizar azken 15 urtean Errenteria-Oreretan bizi den irundarra dago txarangadaren atzean, «Iker Torresek eta biok pentsatu genuen txarangada ideia egokia zela, polita litzatekeela halako zer edo zer egitea Inauteriei begira herrian».
Azken bi urtean herri batukada egin dute Oarsoirriek Inauterien harira, Antzizarrek berak proposatuta, «aurretik esperientzia nuen arrebarekin batera batukada bat sortu genuelako, xumea, Irunen bertan. Oarsoirriak taldeari planteatu nion eta ideia gustatu egin zitzaien». Arrakastatsua izan zen erantzuna. Lehenengo urtean ehun lagunetik gora bildu zituen batukadak, eta ehun bueltan bigarrenean.
Txarangadan zenbat haur eta guraso biltzea espero duten galdetuta, argi erantzun du Antzizarrek, «erronkarik ez da, hogeita hamar lagun biltzen bagara primeran, eta ehun biltzen bagara ere primeran. Ongi pasatzea da kontua, gozatzea ekintzarekin eta ez haur eta guraso kopuru bat biltzea. Inauteriari gure ekarpena egiteko modua da».
Trebetasun berezirik ez
Oarsoirriak taldearen filosofiari jarraituta, haurrak eta gurasoak elkarrekin, familia giroan parte hartuko dute txarangadan. «Zerbait erraza behar zuen izan —esan du Antzizarrek—, gure artean musikariak badaude ere, parte hartuko duten gehienek ez dakitelako jotzen». Txarangadari forma emateko Cadizeko txirigotetara jo dute Torresek eta Antzizarrek: «Haurra nintzenean baserrian kanaberak hartu, moztu, zulotxo bat egin eta alboan plastikoa jarrita txirigotetan erabiltzen dituzten turuten antzeko zer edo zer egiten nuen. Halako turutak egin, kantu ezagun batzuk hartu, eta aurreko bi urteetako batukadako kuboak baliatuta perkusio gisa, txaranga osatuko dugu».
Turutez, txindatez, tronpetez eta perkusio kuboez osatuko dute txarangada, eta instrumentuak sortzeko, berriz, irudimena, berrerabilera eta birziklapena baliatuko dituzte, «lapikoen tapak erabiliko ditugu txindatak egiteko. Turutak egiteko, berriz, hodi zati zaharren bat izango da etxean, baita inbutu zaharren bat ere».
Hiru abesti aukeratu dituzte jotzeko eta herriko kaleak doinu alaiez betetzeko: Lesakako Inauteria, Behera-behera eta Errenteriako Madalenetako Diana. «Kantu ezagunak dira, herrikoiak eta alaiak».
Inauteriei beste bide bat
Oarsoirrien proposamen berriak Errenteria-Oreretan Inauteriak bizitzeko ereduari beste bide bat emango diola argi du Antzizarrek, aurretik batukadak egin duen moduan. Izan ere, aisialdi hezitzaile, euskaldun, plurala eta parte hartzailea sustatzeko sortu zen taldea: «Egunez ez da ia mugimendurik ikusten kaleetan Inauterietan, karroza desfilean ez bada. Gehiena gauez izaten da. Gure eskaintzaren bidez haurrek eta gurasoek tartea izango dute, librea da, edozeinek har dezake parte, eta bide batez ekarpena egiten diogu Inauteriari».
Otsailaren 6an 12:00etan abiatuko da txarangada, eta oraindik ibilbidea zehaztu gabe badute ere, abiapuntua Merkatuzarren izango dutela uste du taldeko kideak, «aurreko urteetan bertatik abiatu delako batukada».
Antzizarrek herritar guztiak animatu ditu parte hartzera, «ez da musikaria izan behar, gogoa izan behar da eta herrian Inauteriei kolorea emateko asmoa izatea denon artean». 
