Hamarnaka herritarrek esan dute ez daudela eraso gehiago jasateko prest

Mezu garbia helarazi zuten, "ez gaude prest gehiago jasateko", eta horren harira, erasotzaileak sozialki baztertzeko deia luzatu zuten atzoko elkarretaratzean.

Ikerne Zarate Gartziarena

Errenteria-Orereta

2016/01/26

Ostiral goizaldeko sexu erasoa salatzeko elkarretaratzea.

Oarsoaldeko Mugimendu Feministak deituta, hamarnaka herritar bildu ziren atzo arratsean joan den ostiralean Errenteria-Oreretako emakume batek jasan zuen sexu erasoa salatzeko, Niessen sarreran egindako elkarretaratzean. Elkartasuna adierazi zioten erasotako emakumeari lehenik, eta baita haren senide eta ingurukoei. Gizona izateak ematen duen boterea eta indarra aprobetxatuta, emakumearen dominazioa bilatzen dela salatu zuten mugimendu feministako kideek elkarretaratze amaieran egindako irakurketan: “Ez dute autonomoki pentsatzea nahi, aritzea nahi, gure gorputzaren gaineko erabakiak hartzerik nahi, eta egunero irakurtzen ditugu pentsamendu eta jarrera honen adibideak, erasoak bat bestearen atzetik… urrutira joan gabe, hemen Euskal Herrian”. Mezu garbia helarazi zuten, “ez gaude prest gehiago jasateko”, eta horren harira, erasotzaileak sozialki baztertzeko deia luzatu zuten, “ez dira askotan saltzen diguten bezala eri mentalak ala gaitz psikologikoak dituzten eroak soilik, baizik eta egun, oraindik, emakumearenganako botere harremanak adierazten dituzten eta emakumeen eskubide eta errespetuaren gainetik jartzen diren gizonezkoak baino”. Sexu erasoak eta indarkeria matxista, arazo sozial zein politikoa dela gogorarazi zuten bestalde, “ez dira etxean gertatzen diren kasu isolatuak, jendarteak eta sistemak berak baimentzen eta isilean onartzen dituen eraso metaketa baizik”. Ostiral goizaldean gertatutako sexu erasoa salatzeko bildu zirela atzo Niessenera esanda, bertan biltzen jarraituko dutela gaineratu zuten mugimendu feministako kideek, “dagokigun askatasuna ukatzen zaigun bitartean, gure gorputzen autodefentsa eginez, gure herri eta auzoetan eraso sexistak dirauten bitartean”.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.