Lezoko Gazte Asanbladak egitaraua antolatu du, Inauterien harira, otsailaren 5erako. Besteak beste Oscar Sarien gala egingo dute egun horretan.
Mozorrotzeko ideia bat: ‘El Exorcista’
Ez, ez da txantxa. Otsailaren 5ean Oscar Sariak banatuko dituzte Lezon. Inauteriekin du harremana sari banaketa honek. Izan ere, aurten, Lezoko Gazte Asanbladak Hollywood eta Lezo uztartu ditu Inauterietako gaia aukeratzeko, eta otsailaren 5erako egitaraua antolatu dute herriko gazteek mozorroen festaren harira. Hau da, herriko kuadrilla eta lagun taldeei filmeekin harremana duten mozorroekin janzteko eskatu diete.
Horrela, lagun talde bakoitzari eskatu diote zein mozorrotzeko gai zein filme izango duen aldez aurretik esateko, bai euren Whatsapp taldean edo
Gazte Asanbladaren Facebook orrialdean, ez daitezen morroak errepikatu.
Honakoa da otsailaren 5erako adostu duten egitaraua:
- 19:00etan, poteo animatua.
- 21:00etan, Oscar Sarien gala. Pelikula bakoitzaren aurkezpena egingo dute taldeek, eta hiru onenek sariak jasoko dituzte.
- 22:00etan, afaria (tokia eta lekua baieztatzeke). Tiketak non eta noiztik salduko diren abisatuko dute.
- Ondoren, musika eta herritik zehar festa.
Herriko kuadrillei antolaketan laguntzeko, eta otsailaren 5eko ekitaldietan parte hartzeko eskatu diete lezoarrei, “ea Lezori bizitza pixka bat ematen diogun”.
Gazte Asanbladaren jarduerez gain, Lezon hain ezagunak diren bestelako jarduerak ere egingo dituzte Inauterietan. Horien berri izan pronto jakinaraziko ditu HITZAk.
